O subdelegado do Goberno en Pontevedra, Abel Losada, animou ao conxunto do sector pesqueiro da provincia de Pontevedra a realizar as súas achegas e participar na elaboración do anteproxecto de lei de control, inspección e réxime sancionador da pesca marítima que impulsa o Ministerio de Agricultura, Pesca e Alimentación. Esta nova normativa, de gran relevancia para unha provincia con tanto peso no sector, iniciou o trámite de audiencia a información públicas, que permanecerá aberto ata o próximo día 30. As achegas ao novo documento deberán realizarse de maneira telemática a través da web do ministerio.
Abel Losada explicou que a través deste trámite a Secretaría Xeral de Pesca pretende promover e garantir a participación pública na elaboración da nova Lei. A aprobación desta normativa é un compromiso programático do Goberno de España que se sustenta na necesidade de actualizar a Lei de Pesca Marítima do Estado, xa que nos seus máis de 20 anos de vixencia producíronse unha serie de novidades tanto na lexislación comunitaria como na gobernanza internacional dos océanos.
Este anteproxecto de lei forma parte do paquete lexislativo co que o Goberno pretende fixar os principios reitores da política pesqueira dos próximos anos. Así, súmase á Lei de Pesca Sostible e Investigación Pesqueira, aprobada en marzo de 2023, e complementarase cunha terceira normativa destinada á ordenación do sector e a comercialización.
A nova lei incorporará as modificacións de varios regulamentos da Unión Europea en materia de control aprobadas en decembro de 2023.
Unha das principais novidades do anteproxecto de lei é a flexibilización do réxime sancionador e a harmonización co resto dos sistemas de cumprimento dos Estados membros da UE. A través desta reforma contémplase unha nova regulación das infraccións e introdúcese un elemento de flexibilización na tipificación das condutas infractoras, mediante o establecemento dunha serie de criterios en liña co sistema introducido pola reforma do regulamento de control comunitario.
A nova lei reforzará tamén a loita contra a pesca ilegal, non declarada e non regulamentada e revísanse os sistemas de control como garantía do cumprimento da Política Pesqueira Común.