Nekazaritzako Enplegua Sustatzeko Programak sei milioi euro baino gehiago bideratu ditu Murtziako Eskualdeko landa-eremu deprimituetako langileak kontratatzeko

• Diru-laguntzaren zenbatekoak ez du murrizketarik izan 2011tik, eta % 5 handitu da iazkoaren aldean
• 2012tik 2023ra, Murtziako Eskualdeak 60 milioi euro inguru jaso ditu, eta, horri esker, 15.445 langile kontratatu ditu
• Programa honen helburua da landa-eremu ahuletako behin-behineko langileen egoera hobetzea

2023ko martxoaren 29an. Nekazaritzako Enplegua Sustatzeko Programak 6.055.379,36 euro bideratuko ditu 2023ko deialdian behin-behineko 1.207 langile inguru kontratatzeko Murtziako Eskualdeko hogeita bi udalerritako landa-eremu deprimituetan.

José Vélez Gobernuaren ordezkaria buru duen Segimendurako Eskualde Batzordeak funts batzuen banaketa onartu du. Funts horiek Estatuko Enplegu Zerbitzu Publikoak eman ditu oso-osorik, eta, iazkoarekin alderatuta, % 5 hazi dira; 2016tik, % 31,9raino igo dira.

Programa horren helburua da Nekazaritzako Langileen Sistema Bereziko behin-behineko langileen egoera hobetzea, bi helbururekin: haien prestakuntza eta enplegagarritasuna hobetzea, eta, gainera, landa-eremu ahuletan errotzea sustatzea.

Diru horrekin, toki-korporazioek kudeatu eta kontratatutako interes orokor eta sozialeko proiektuetan lanak egiteko soldata-kostuak eta enpresa-kotizazioak finantzatzen dira.

Obren hasiera aldatu egiten da udalen arabera; izan ere, baldintza da proiektua gauzatzea nekazaritza-jarduera txikiko aldiekin bat etortzea. Aurtengo aurreikuspenen arabera, uztailaren bigarren hamabostaldian edo abuztuaren hasieran hasiko dituzte udalek proiektuak.

Eskualdeko Segimendu Batzordearen bileran erabaki da kreditua udal onuradunen artean banatzea, merkatu-adierazlea eta irizpide historikoa oinarri hartuta, taula honen arabera.

Eskualdeko lau kontseilutan (Mula, Caravaca, Cieza eta Lorca) bilduta dauden hogeita bi udalerriek beren memoriak aurkeztu beharko dituzte hemendik aurrera, baita interes orokorreko proiektuak gauzatzeko beharrezko diru-laguntzak eskatu ere.

“Urte hauetan guztietan, programa honek erakutsi du eraginkorra dela gure landa-eremu deprimituenetan pizgarri sozial eta ekonomiko gisa, eta, horregatik, SEPEren eta Espainiako Gobernuaren konpromisoari esker, urtero nabarmen handitu dira horretara bideratutako kredituak”, azaldu du Gobernuaren ordezkariak.