Balear Uharteetako 27.500 biztanlek baino gehiagok 200 €-ko laguntza jaso dute kalteberatasun-egoeran dauden herritarren artean prezio-igoeraren ondorioak arintzeko

2022an 27.000 euro baino gutxiagoko errenta duten langileak, autonomoak eta langabeak dira neurri horren onuradunak –eskaera egiteko epea martxoaren 31n amaitu zen–.

Guztira 27.553 pertsonak jaso dute Balear Uharteetan Gobernuak onartutako 200 euroko laguntza, inflazio handiaren eragina arintzeko, bereziki kolektibo zaurgarrienetan, Zerga Agentziaren datuen arabera.

Iazko abenduaren amaieran Exekutiboak onartutako ekimen horren onuradunak norberaren edo besteren konturako langileak eta 2022ko langabezia-prestazioaren edo -subsidioaren onuradunak dira, baldin eta iaz 27.000 euro gordineko errenta gainditzen ez bazuten, eta haien ondarea, ohiko etxebizitza kenduta, 75.000 eurotik gorakoa ez bada. Gainera, 2022an ohiko bizilekua Espainian izan behar dute.

Zenbatekoak kalkulatzeko, etxebizitza berean bizi diren honako pertsona hauen errenta eta ondarea batu behar dira: onuraduna bera, bere ezkontidea edo izatezko bikotekidea, 25 urtetik beherako ondorengoak, edo desgaitasuna dutenak, 8.000 euro baino gehiagoko errentarik ez dutenak, eta bigarren mailara arteko arbasoak lerro zuzenean (gurasoak eta aitona-amonak).

Helburua: ahultasun-egoerak murriztea

Laguntza hori eskatzeko epea joan den martxoaren 31n amaitu zen eta, aurreko 200 euroko dirulaguntzarekin gertatzen zen bezala, laguntzatik kanpo geratzen dira pentsiodunak eta Bizitzeko Gutxieneko Diru-sarrera (BMI) jasotzen dutenak, Gobernuak onartutako beste neurri batzuen onuradun direlako jada, hala nola, kotizazio gabeko pentsioen eta Bizitzeko Gutxieneko Diru-sarreraren %15eko igoera. Era berean, pentsiodunek erosteko ahalmena bermatua dute pentsioak KPIaren arabera errebalorizatuz.

Beraz, 200 euroko ordainketa bakarreko laguntza horren bidez —abenduaren 27ko 20/2022 Errege Lege Dekretuan jasoa—, aurreko prestazioaren onuradun gehiago izango dira, prezioen igoerak bereziki errenta txikienengan duen eragin kaltegarria arintzeko. Hala, murriztu egiten dira kalteberatasun ekonomikoko egoerak, gizarte-izaerako beste prestazio batzuek estaltzen ez dituztenak, hala nola pentsioek edo BMIak.

Inflazioak herrialdeko gehiengo sozialean duen eragina arintzeko gobernuak onartutako neurri sortaren baitan kokatzen da 200 euroko laguntza.