Nekazaritza, Arrantza eta Elikadura Ministerioak 25,6 milioi euro inbertitu ditu Peñarroyako Urtegi Estuko (Ciudad Real) ureztaketak modernizatzeko. 7.842 hektareari eragiten diete lanek, eta 2.000 ureztatzaileri egingo die mesede, Argamasilla de Alba, Tomelloso eta Campo de Criptana udalerrietan.

Begoña Garcia Nekazaritza eta Elikadurako estatu idazkaria obrak bisitatzen izan da gaur, eta azaldu du jarduera horrekin nekazariek “onura handia” nabarituko dutela, haien egungo ureztatze sistema modernizatuta “urtegian dagoen energia hidraulikoa baliatu ahal izango dutelako ureztatzeko eta putzuetatik ponpaketa beharra murriztu edo saihesteko”.

Horretarako, lurpeko konexio hidraulikoa egingo da urtegitik, beste eroanbide baten bidez, behar besteko presioarekin, ponpaketa eta energia elektrikoaren kontsumoa % 68raino murrizteko. Aldi berean, kanaletatik gaur egun ura galtzea saihestuko da.

“Horrek guztiak ustiapen kostuak murriztea eta inguruko laboreen errentagarritasuna areagotzea ekarriko du, batez ere mahatsondoa, garagarra, tipula eta meloiarena”, zehaztu du Garciak.

Halaber, proiektuaren barruan sartzen da ureztapena telekontrolatzeko eta automatizatzeko sistemak instalatzea, sistema horien eraginkortasuna areagotzeko, edo ingurumen-neurriak hartzeko, hala nola uren kalitatea kontrolatzeko sare bat ezartzea, landare-egiturak sortzea eta faunaren bizigarritasuna hobetzeko beste batzuk.

Jarduera Suspertze, Transformazio eta Erresilientzia Planaren barruan dago, eta Europar Batasuneko Next Generation funtsek kofinantzatzen dute. Izaera publiko-pribatua duenez, ekarpen publikoa gastu hautagarrien kostuaren % 80koa izango da gehienez, eta jarduketaren xede diren ureztatzaile-erkidegoek eta erabiltzaileek gainerako ekarpena egingo dute.

---