El delegado do Goberno en Galicia, Pedro Blanco, encomiou hoxe na apertura de ‘Xantar 2024’ o protagonismo de Ourense e de Galicia dentro do Plan Nacional de Turismo Gastronómico, que impulsa o Goberno de España no marco da política de mellora da competitividade turística do país. Pedro Blanco interveu na inauguración da 25ª edición do Salón Internacional de Turismo Gastronómico ‘Xantar’, que se celebra en Expourense, acompañado polo subdelegado do Goberno na provincia, Eladio Santos.
O delegado puxo en valor os proxectos que, dentro deste Plan Nacional, financia o Goberno na provincia de Ourense con 4 millóns de euros. En concreto, son os plans de sustentabilidade turística que teñen como protagonistas os viñedos e a industria vinícola das comarcas de Valdeorras e do Ribeiro e o plan turístico ao redor da gastronomía do polbo no Carballiño, e “que xa están en marcha grazas ao apoio do Goberno de España”, engadiu.
Estos tres plans forman parte do conxunto de investimentos que o Goberno de España acordou nos últimos anos para a modernización turística de 43 destinos turísticos de Galicia e que superan os 108 millóns de euros, entre fondos propios e do Plan de Recuperación, Transformación e Resiliencia do Goberno. “Son destinos que estamos a modernizar en Galicia en colaboración co resto de administracións, asociacións e tamén coas empresas do sector”, subliñou Pedro Blanco.
O delegado quixo destacar que esta aposta do Goberno, que tomou forma tras a pandemia, está formada por un conxunto de accións transversais “que melloran non só os produtos turísticos, senón tamén as localidades de destino, a competencia laboral dos traballadores, e a modernización e dixitalización das empresas que provén estes servizos”.
Un feito que é particularmente importante no turismo gastronómico e enológico pois, como apunta o propio sector e lembrou o delegado, “as persoas que optan por este turismo demandan, cada vez máis, unha experiencia completa, de calidade, que, á vez, sexa ambientalmente sustentable e que contribúa ao crecemento económico e demográfico dos pobos onde se asinta”.
Pedro Blanco finalizou a súa intervención felicitando ás persoas” que integran a organización de Xantar polos 25 anos de éxitos deste salón”, e por convertelo en “referente a nivel nacional”.