Segundo o artigo 290 do Tratado de Funcionamento da Unión Europea (TFUE), a Comisión Europea executa a lexislación a nivel comunitario. En concreto, cada acto lexislativo precisa o alcance das competencias de execución asignadas á Comisión polo Consello da Unión Europea. Neste contexto, o Tratado prevé que a Comisión estea asistida por un comité, segundo un procedemento chamado de “comitología”.

O termo "comitología", por tanto, resume o sistema polo que a Comisión exerce as competencias de execución que lle outorga o lexislador da Unión Europea, coa asistencia de comités de representantes dos Estados membros.

Os comités son foros de debate compostos por representantes dos Estados membros e presididos por funcionarios da Comisión que permiten a esta establecer un diálogo coas administracións nacionais antes de adoptar medidas de execución. Deste xeito, a Comisión asegúrase de que estas medidas se adapten o mellor posible á realidade de cada país. A maioría dos comités reúnese varias veces ao ano (xeralmente en Bruxelas).

A “comitología” está regulada, desde o 1 de marzo de 2011, polo Regulamento (UE) 182/2011 do Parlamento Europeo e do Consello, que establece as normas e os principios xerais relativos ás modalidades de control por parte dos Estados membros do exercicio das competencias de execución pola Comisión.

No caso de España, as Comunidades Autónomas foron incrementando paulatinamente a súa participación, que alcanza na actualidade máis dun centenar dos Comités da Comisión Europea. Esta participación concrétase formando parte da delegación española nos estes comités e a condición de que se reúnan os seguintes requisitos:

1. As competencias das Comunidades Autónomas sobre as materias que se traten nos diferentes comités.
2. A vontade expresa dun número significativo de Comunidades Autónomas ou a existencia dun interese específico que aconselle a participación nos correspondentes comités.
3. A dispoñibilidade de persoal con capacitación técnica adecuada para participar nas reunións dos comités e que manteña unha relación funcionarial ou laboral cunha Administración autonómica.

A asistencia do funcionario ou técnico designado pola Comunidade Autónoma ás reunións dun determinado comité producirase en representación do conxunto das Comunidades Autónomas.