Na acta constitutiva da Comisión concíbese como foro ou punto de encontro de ambas as Administracións, e por iso, como un instrumento de colaboración entre as mesmas, co fin de impulsar programas e posibles actuacións conxuntas para o desenvolvemento de políticas comúns nos distintos ámbitos sectoriais, e servir de canle de actuacións de carácter preventivo no intento de evitar que xurdan conflitos entre ambas as Administracións, e arbitrar propostas de solución a cuestións que interesen ás citadas Administracións en asuntos da súa competencia.

Para estes efectos, a Comisión poderá examinar calquera asuntos que afecten a ambas as partes, e en particular, os que teñan por obxecto evitar ou tentar resolver por vía extraprocesual conflitos de competencias, así como deseñar mecanismos de colaboración mutua nas distintas áreas en que, poida confluír a actividade de ambas as Administracións.