- O Escape Room da DXT —coñecido como "La hora de ouro"— é un recurso educativo no que os participantes recrean un accidente de tráfico e deben resolver en equipo nun prazo máximo de sesenta minutos
- “Actividades formativas como esta permiten construír unha sociedade máis concienciada co seu papel na seguridade viaria”, sinalou López
- 24 alumnos de 1° de Bacharelato do IES Sanxillao participan nesta iniciativa da Dirección Xeral de Tráfico
La subdelegada do Goberno en Lugo, Olimpia López, visitou o IES Sanxillao, onde 24 alumnos de 1° de Bacharelato participaron no Escape Room de Seguridade viaria da Dirección Xeral de Tráfico. Alí, López sinalou que “actividades formativas como esta permiten construír unha sociedade máis concienciada co seu papel na seguridade viaria. Os alumnos que participan poderán ser condutores dentro dun ano e aplicar estes coñecementos en situacións reais, que poderían axudar a salvar vidas”.
O Escape Room da DXT —coñecido como "La hora de ouro"— é un recurso educativo, que a Xefatura Provincial de Tráfico de Lugo pon a disposición dos centros educativos da provincia, no que os participantes recrean un accidente de tráfico e deben resolver en equipo nun prazo máximo de sesenta minutos. “Esa franxa de tempo, chamada «hora de ouro», é o intervalo crítico desde que se produce un sinistro ata que as vítimas son atendidas, tempo no que unha resposta rápida e eficaz pode marcar a diferenza entre a vida e a morte”, destacou a subdelegada.
Esta actividade formativa, de carácter lúdico e participativo, ten como obxectivo concienciar ao alumnado sobre os riscos do tráfico e a importancia de adoptar condutas seguras na vía pública.
A dinámica articúlase en catro equipos que simulan os corpos que interveñen nunha emerxencia real: Garda Civil, Policía Local, persoal sanitario e civís, que deben cooperar para resolver unha serie de probas e enigmas relacionados coa seguridade viaria. Ao longo do xogo trabállanse contidos como a conduta P.A.S (Protexer, Avisar e Socorrer), os efectos do consumo de sustancias na condución, a normativa aplicable a vehículos de mobilidade privado ou as estatísticas de sinistralidade.
A actividade desenvolverase entre o 8 de abril e o 17 de maio de 2026. Os centros interesados en participar deberán porse en contacto antes do 30 de abril de 2025 a través do correo electrónico educacionvial.jptlu@dgt.es.
O Escape Room de Seguridade viaria é un recurso gratuíto dispoñible para centros educativos, entidades públicas e privadas, e calquera organización cuxos participantes sexan maiores de 14 anos.