- Ábrense así dúas normas á participación cidadá respondendo os compromisos do Goberno de España coa transparencia na toma de decisións e a integridade pública e o desenvolvemento do IV Plan de Goberno Aberto
O Ministerio de Política Territorial e Función Pública abre un período de consulta pública, desde hoxe e ata o próximo 28 de maio, para fomentar a participación cidadá, a través do Portal da Transparencia e da páxina web do Ministerio, dos anteproxectos de lei de transparencia e integridade nas actividades dos grupos de interese e de prevención de conflitos de intereses do persoal ao servizo do sector público.
A consulta previa é un trámite previsto na Lei 39/2015, do Procedemento Administrativo Común das Administracións Públicas co obxectivo de mellorar a participación da cidadanía no procedemento de elaboración de normas.
O ministro Miquel Iceta anunciou en distintas comparecencias que coa nova normativa sobre os grupos de interese, o obxectivo do Goberno é regular as actividades de grupos ou entidades -institucionalizadas ou non- representativos de intereses (lobbys), baixo estándares avanzados de integridade e transparencia.
Doutra banda, en relación á prevención de conflitos de intereses, o ministro tamén reiterou o seu compromiso para establecer un novo réxime para as empregadas e empregados públicos que reforzará a súa profesionalidade, eficacia, imparcialidade e transparencia no cumprimento das súas responsabilidades.
Transparencia e integridade nas actividades dos grupos de interese
Como ocorre noutros países da nosa contorna, é necesario acometer este avance normativo, en consonancia co compromiso do Goberno de España pola transparencia na toma de decisións e a integridade pública e para desenvolver o IV Plan de Goberno Aberto (Eixo de Integridade), que inclúe esta medida.
Obxectivos da norma:
- Definición dos grupos e colectivos afectados
- Establecemento de normas de publicidade e rexistro
- Definición dos deberes e obrigas dos integrantes destes grupos
- Limitacións das portas giratorias entre altos cargos e empregados públicos, por unha banda, e os grupos de interese, por outro
- Establecemento dun código de conduta
- Atribución da xestión deste rexistro á Oficina de Conflitos de Intereses (OCI), dadas as súas competencias sobre o control dos conflitos de intereses de altos cargos e empregadas e empregados públicos
Prevención de conflitos de intereses do persoal no sector público
É necesario modificar algúns preceptos para adecualos ás demandas da nova Administración, máis esixente, e establecer un sistema de prevención e xestión de conflitos de intereses que non estea dirixido exclusivamente ás limitacións aplicables ao desempeño dunha segunda actividade. Por outra banda, a aparición de novas formas de prestación de actividades profesionais esixe unha regulación que as contemple de forma específica. Así mesmo, preténdese dar cumprimento ás recomendacións do Grupo de Estados contra a Corrupción do Consello de Europa (GRECO) relativas á promoción da integridade pública.
Obxectivos da norma:
- Establecer un novo sistema de prevención de conflitos de intereses e de incompatibilidades dos empregados do sector público.
- Regular o desempeño de novas formas de prestación de actividades profesionais que non están contempladas na normativa vixente.
- Nova regulación de actividades exceptuadas do réxime de incompatibilidades
- Establecer limitacións ao desempeño de actividades privadas nos supostos de situacións administrativas distintas ás de servizo activo.
- Establecer un novo e máis rigoroso sistema de prevención de conflitos de intereses para o persoal eventual.