O Goberno aproba o acordo polo que se autoriza a execución das obras de construción do novo edificio de Xulgados en Manacor, Mallorca

A urxencia e o excepcional interese público das obras derivan da necesidade de concentrar nun só edificio os xulgados que agora se sitúan nun edificio e dous locais arrendados, ademais de emendar as deficiencias que teñen en relación coa normativa técnica esixible

O Consello de Ministros aprobou na súa reunión de hoxe o acordo polo que se autoriza a execución das obras de construción do novo edificio de Xulgados en Manacor, rúa Pilar s/n (Mallorca, Illes Balears).

A urxencia e o excepcional interese público das obras, declarada mediante Orde do 29 de agosto de 2023 pola Ministra de Xustiza, derivan da necesidade de concentrar nun só edificio os xulgados que agora se sitúan nun edificio e dous locais arrendados, así como de emendar as deficiencias que estes teñen en relación coa normativa técnica esixible. Por estes motivos xustifícase a necesidade de construír un novo edifico de xulgados que dea solución a estes problemas sinalados e teña capacidade para todos os órganos xudiciais existentes, dando unha marxe para o seu crecemento.

Á vista da urxencia e o excepcional interese público que revisten as obras, o Ministerio de Vivenda e Axenda Urbana (MIVAU) eleva ao Consello de Ministros a proposta de que acorde a execución das obras e ordene a iniciación do procedemento de modificación do plan urbanístico vixente no municipio de Manacor, na súa concreta aplicación á superficie afectada pola implantación das obras a realizar.