O Ministerio de Transportes vén de executar, con cargo ao contrato de mantemento das estradas nacionais da zona Norte da provincia recentemente adxudicado, as obras de sinalización horizontal que atenden a demanda da veciñanza e do Concello de Silleda para permitir o acceso directo aos núcleos de poboación na marxe esquerda da N-640 ao paso por Senra, na parroquia de Escuadro.
En os últimos días modificouse a sinalización horizontal da estrada co pintado dun cebreado central e o correspondente carril de xiro poñendo fin, deste xeito, ao deber de continuar a marcha para facer un cambio de sentido á altura dun restaurante situado case medio quilómetro máis adiante, en dirección á Estrada. Diante da imposibilidade de virar neste punto, tanto a veciñanza como os transportistas que atenden esta zona gandeira, viñan soportando esta molesta manobra. Ademais, a mellora afecta tamén positivamente á veciñanza de Moalde para os traxectos en direción a Chapa.
La actuación foi solicitada pola alcaldesa de Silleda e deputada no Congreso, Paula Fernández, durante a reunión que mantivo co subdelegado do Goberno, Abel Losada, o pasado 2 de maio. Unha reunión na que tamén participaron o xefe da Demarcación de Estradas do Estado en Galicia, Anxo González do Río, e o xefe provincial, Pablo Domínguez.
Abel Losada admitiu a súa sorpresa diante desta situación, tendo en conta que a alcaldesa explicoulle que a problemática xurdiu no ano 2001, cando durante unhas obras na N-640 pintouse unha liña continua imposibilitando o xiro. Xa no ano 2007 barallouse a posibilidade de construír carrís de aceleración e tamén un paso soterrado, pero a solución foi descartada polo seu elevado custo.
Abel Losada agradece a implicación dos responsables da Demarcación de Estradas en Galicia e na provincia de Pontevedra “para dar esta solución racional a un problema que, como moi ben explicou a alcaldesa durante a reunión que mantivemos, debería estar solucionado desde hai moito tempo”.
O subdelegado recalcou que esta obra se acometeu con cargo ao novo contrato de mantemento das estradas nacionais no sector norte da provincia, que vén de ser adxudicado por un importe de 8,73 millóns de euros cunha duración de tres anos. “Este Goberno de España apostou con intensidade pola conservación porque era necesario un esforzo nacional para reveter os efectos acumulados da política de recortes durante a etapa do presidente Rajoy, cando se alcanzaron mínimos históricos”. Losada engadiu que a vida útil media dun pavimento asfáltico son 15 anos “e por tanto, como todo o mundo pode entender, daqueles recortes estas fochancas, así que agora toca investir todo o que non se fixo entre 2011 e 2018”.