A Delegación do Goberno acolleu esta mañá a reunion da Comisión de Tráfico Seguridade Viaria e Mobilidade Sustentable para abordar os datos de sinistralidade viaria 2023, e avance provisional de sinistralidade no primeiro trimestre de 2024. Do mesmo xeito que no resto do territorio nacional, rexistrouse un aumento no número de sinistros viarios con vítimas, tanto en vías urbanas como interurbanas. Nesta reunión púxose de manifesto o aumento do número de accidentes con vítimas con respecto aos rexistrados en 2022 (de 257 a 418), así como o número de hospitalizados (de 10 en 2022 pasamos a 16 en 2023).
En 2023 faleceu unha persoa como consecuencia de accidentes de tráfico. Todos os falecidos en vías urbanas desde o ano 2020 foron usuarios vulnerables (peóns e usuarios de motocicleta).
Respecto do primeiro trimestre de 2024, as cifras provisionais tamén rexistran un lixeiro aumento respecto do mesmo período de 2023, pasando de 72 accidentes con vítimas en 2023 a 81 en 2024.
As principais causas de accidentalidade foron as distraccións (lembrar que a principal causa de distracción é o uso do teléfono móbil) e a velocidade inadecuada.
Ademais repasáronse as actividades levadas a cabo no seo da Subcomisión Provincial de Educación Viaria, con sesións formativas nos distintos centros de educación primaria e secundaria, así como no ámbito da discapacidade; e a impartición de cursos en liña dirixidos aos docentes, sobre formación ciclista e estratexias metodolóxicas derivadas da entrada en vigor da LOMLOE.