- O obxectivo da reforma é situar a taxa de temporalidade estrutural por baixo do 8% en todo o emprego público
- O Plan prevé actuacións inmediatas para remediar a elevada temporalidade existente e articular medidas eficaces para previr e sancionar o abuso e a fraude na temporalidade a futuro
- O documento, que agora será trasladado aos sindicatos, recolle boa parte das achegas realizadas por CCAA e a FEMP
- A redución da temporalidade é unha das reformas comprometidas con Bruxelas no Plan de Recuperación, Transformación e Resiliencia
O ministro de Política Territorial e Función Pública, Miquel Iceta, presidiu este xoves, por vía telemática, a reunión da Conferencia Sectorial de Administración Pública, na que están representadas as CCAA e a FEMP (Federación Española de Municipios e Provincias).
O ministro presentou aos representantes autonómicos e locais o borrador do Plan de choque para reducir a temporalidade nas administracións públicas.
Trátase do segundo encontro da Conferencia Sectorial nos últimos 7 días. Durante o primeiro, celebrado o pasado 24 de xuño, instouse ás CCAA e á FEMP a presentar por escrito as achegas que considerasen oportuno.
O texto que hoxe se presentou incorpora boa parte das achegas que quince CCAA e a FEMP fixeron chegar por escrito así como as que se puxeron sobre a mesa de forma verbal durante a Comisión de Coordinación do Emprego Público, o órgano técnico de colaboración da Conferencia Sectorial reunido esta
mesma semana.
A reforma que ultima o Goberno para acoutar a temporalidade no emprego público parte de catro alicerces:
- A aposta polo público, dotando á Administración do marco xurídico necesario para prestar con garantía e eficacia os servizos públicos.
- A profesionalización do modelo de emprego público, co centro no persoal funcionario de carreira, e a delimitación dos supostos de nomeamento de persoal temporal.
- O mantemento da figura de persoal funcionario interino, establecendo o seu réxime xurídico de face a garantir a adecuada utilización desta modalidade de persoa.
- A esixencia de responsabilidade da Administración ante unha inadecuada utilización da figura de persoal funcionario interino, contribuíndo por outra banda, a impulsar e fortalecer unha adecuada planificación de recursos humanos.
O borrador do Plan de choque para reducir a temporalidade será agora trasladado aos sindicatos con representación nas administracións públicas.