A norma modifica algunhas medidas preventivas por razóns de protección da saúde pública e o réxime sancionador que recibiron observacións de inconstitucionalidade
Madrid, 16 de marzo de 2021.- O Consello de Ministros acordou solicitar ao Consello de Estado un ditame sobre a posible inconstitucionalidade de varios apartados da Lei de Galicia 8/2021, que modifica a Lei 8/2008, de saúde autonómica.
A norma realiza unha serie de modificacións en medidas preventivas por razóns de protección da saúde pública e do réxime sancionador que recibiron observacións de inconstitucionalidade por parte dos correspondentes Departamentos Ministeriais.
A solicitude efectuarase á Comisión Permanente do Consello de Estado con carácter urxente Este terá ata o 23 de marzo para emitir un ditame. O prazo para a interposición do recurso de inconstitucionalidade finaliza o 26 de maio de 2021.
Reserva de Lei Orgánica
A impugnación exponse ao considerar que a norma autonómica introduce restricións e limitacións aos Dereitos Fundamentais que segundo o artigo 81 da Constitución Española están reservadas a unha Lei Orgánica, que por tanto só pode ser ditada polo lexislador estatal.
Neste sentido, a norma autonómica regula pormenorizadamente os mecanismos extraordinarios para tutelar a saúde pública ante crises sanitarias con respecto á lexislación estatal, incidindo sobre os dereitos fundamentais dunha maneira que non se pode considerar un mero desenvolvemento da Lei Orgánica estatal.
É o caso do artigo 5, que establece entre outras medidas preventivas en materia de saúde pública que a comunidade autónoma poderá someter “a medidas profilácticas de prevención da enfermidade, incluída a vacinación ou inmunización”.
Tamén no seu artigo 7, que engade medidas preventivas en materia de saúde pública, a lei autonómica vulnera a reserva de Lei Orgánica.
Igualmente, resultarían inconstitucionais as previsións contidas nos apartados 12, 13, 14 e 15, que constitúen o réxime de infraccións e sancións asociado ás condutas reguladas nos apartados 5 e seguintes.
Estados Excepcionais
Por outra banda, a norma pode vulnerar o artigo 116 da Constitución, que regula os estados excepcionais. No marco do vixente estado de alarma, as CCAA ostentan atribucións delegadas que non poden utilizarse para aprobar esta lei ordinaria como se fosen facultades correspondentes á “xestión ordinaria”, das súas competencias.
Competencias estatais
Tamén se alega á competencia exclusiva do Estado respecto das bases e a coordinación xeral da sanidade que recolle a Constitución.
Finalmente, respecto da posibilidade de obrigar aos cidadáns a vacinarse que recolle a lei tamén se entende que ademais de afectar á reserva de Lei Orgánica e ao ámbito competencial do Estado en materia sanitaria, non considera a Estratexia de Vacinación fronte a COVID 19 en España, aprobada o 28 de xaneiro polo Consello Interterritorial do Sistema Nacional de Saúde e de obrigado cumprimento. A Estratexia recolle que a vacinación será voluntaria.