O ministro de Política Territorial e Función Pública recibe a carteira da súa predecesora, Carolina Darias
“Creo no público porque é de todos, garante dereitos e ampara liberdades”
27 de xaneiro de 2021. Miquel Iceta recibiu esta mañá a carteira do Ministerio de Política Territorial e Función Pública, de mans da súa predecesora, CarolinaDarias, tras prometer o cargo ante o rei.
No seu discurso, durante o acto de traspaso da carteira, Iceta puxo sobre a mesa a súa visión de España. “Gústame España como é: diversa, plural e unida”. E profundou na idea: “Quero unha España forte na súa unidade e orgullosa da súa diversidade”.
Iceta agradeceu a confianza do presidente do Goberno, Pedro Sánchez, e comprometeuse a exercer como un home de cooperación, colaboración, coordinación e cogobernanza.
Tamén agradeceu o labor da súa predecesora, Carolina Darias. Neste sentido, asegurou que vai continuar coa liña de traballo emprendida, co reto de modernizar e dixitalizar a Administración, así como seguir avanzando na consecución de fondos europeos.
Por outra banda, a cogobernanza, en cuxo exemplo se erixiu o Consello Interterritorial do SNS, “é o camiño”, sinalou. Iceta insistiu en que “non hai fortaleza máis sólida que a que xorde do acordo e do pacto”.
Tamén fixo unha firme defensa do público: “É o de todos. Garante dereitos e ampara liberdades”.
Iceta defendeu expresamente o seu “compromiso coa Constitución Española” e asegurou que asume o cargo “fiel e comprometido” cun programa de coalición progresista que se está cumprindo e cun proxecto de país.
Carolina Darias, ao entregar a carteira a Miquel Iceta, destacou o ano que estivo á fronte do Ministerio de Política Territorial e Función Pública: “Traballamos duramente para pór en marcha proxectos ilusionantes, como a vertebración do país e a cohesión territorial para lograr unha maior cohesión social, sempre de xeito conxunto con todos, porque a cooperación territorial é a base para cohesionar e coser este país".