O Consello de Ministros aproba destinar 15 M€ á renovación de oficinas de emprego

O Consello de Ministros aprobou, por proposta do Ministerio de Traballo e Economía Social, a convocatoria de subvencións destinadas a financiar a renovación de instalacións de oficinas con persoal do Servizo Público de emprego Estatal (SEPE) por un importe total de 15.000.000 euros.

Os fondos, con cargo ao orzamento de gastos do Servizo Público de emprego Estatal, executaranse no exercicio 2023. No período 2020- 2023 investíronse 45.000.000 euros na renovación destas dependencias.

Obxecto da subvención

O investimento permitirá levar a cabo obras de renovación, adecuación e reparación total ou parcial das instalacións, centros e dependencias das oficinas de emprego tanto novas como xa existentes.

As beneficiarias destas subvencións son as administracións autonómicas titulares ou que poidan adquirir a titularidade das oficinas de emprego.

As comunidades autónomas teñen a responsabilidade de manter e renovar as oficinas de emprego xa que ostentan a titularidade da rede a partir da transferencia de funcións e servizos en materia de xestión de traballo, o emprego e a formación profesional para o emprego, coas súas instalacións, mobiliario e equipos. Nestes espazos intégranse tamén as oficinas de prestacións do Servizo Público de Emprego Estatal que contribúe á súa modernización cos fondos que se distribúen nas correspondentes convocatorias.