La subdelegada do Goberno nA Coruña, María Rivas, destacou hoxe a importancia da licitación do proxecto da obra da nova pasarela peonil de acceso ao castelo de Santa Cruz, no concello de Oleiros, por parte do Goberno de España a través do Ministerio para a Transición Ecolóxica e o Reto Demográfico. A actuación conta cun orzamento de 74.887,63 euros e o prazo de presentación de ofertas estará aberto ata o 2 de setembro.
“Falamos dunha intervención de enorme valor simbólico, social e patrimonial”, subliñou Rivas, quen lembrou que o castelo de Santa Cruz é un Ben de Interese Cultural e un emblema da defensa costeira galega. A nova pasarela permitirá mellorar o acceso peonil á illa, garantindo a seguridade e respondendo a unha demanda reiterada da veciñanza e do Concello.
A subdelegada explicou que esta actuación “vai máis aló da infraestrutura”, pois supón unha aposta pola conservación do patrimonio e o turismo sustentable. “O castelo acolle actividades culturais e educativas que atraen a milleiros de visitantes cada ano. Mellorar o acceso é tamén mellorar a proxección turística de Oleiros”, concluíu.