A subdelegada do Goberno nA Coruña, María Rivas, realizou esta mañá un chamamento á responsabilidade e prudencia na condución coincidindo co inicio da Operación Especial de Tráfico “Santiago – 2025”, que se desenvolverá desde as 15:00 horas deste xoves 24, ás 24:00 horas do domingo 27 de xullo, coincidindo coa festividade do Apóstolo Santiago e o inicio dun fin de semana estival de alta mobilidade.
Segundo destacou Rivas, só en Galicia espérase a circulación de máis de 555.000 vehículos, sendo A Coruña unha provincia cun alto volume de desprazamentos, cunha estimación de 191.000. Os principais destinos serán as zonas costeiras e segundas residencias, cunha maior concentración de tráfico nas tardes do xoves, venres e domingo.
Para dar cobertura a este dispositivo, a Dirección Xeral de Tráfico contará coa máxima dispoñibilidade dos seus medios humanos e técnicos. O operativo inclúe a presenza da Agrupación de Tráfico da Garda Civil, persoal dos Centros de Xestión de Tráfico, helicópteros con cámaras, drones de vixilancia e paneis de mensaxería variable.
“Apelo á cidadanía para que planifique as súas viaxes, evite as horas de maior intensidade e, sobre todo, respecte as normas de tráfico, porque o obxectivo común é chegar e volver con seguridade”, pediu a subdelegada.
“Estamos nun dos períodos do ano con maior mobilidade nas estradas galegas, e iso obríganos a extremar as precaucións. A seguridade viaria non depende só dos medios despregados, senón tamén da responsabilidade individual. O noso obxectivo é claro: que todas as persoas que salguen volvan sans e salvas ás súas casas”, finalizou.
Foto de arquivo da presentación da campaña especial de Tráfico de control de alcol e drogas ao volante este verán.