La subdelegada en Lugo, Isabel Rodríguez, presentou esta mañá dous novos Puntos Violeta nas oficinas do INSS e a TGSS na cidade de Lugo, acompañada polo director provincial do Instituto Nacional da Seguridade Social, Juan José Rodríguez Gude, e persoal destas administracións. Con esta incorporación, continúa a ampliación progresiva desta rede de espazos seguros e accesibles para ofrecer información, apoio e derivación das mulleres en situación de violencia de xénero.
O persoal das oficinas recibiu na Subdelegación lucense unha formación específica que lles permitirá actuar con rigor e sensibilidade ante casos de violencias machistas, seguindo os protocolos establecidos pola Administración. Estes puntos teñen como obxectivo facilitar o acceso aos recursos institucionais e servir de primeira referencia a calquera muller que se atope en situación de risco ou necesite orientación.
“A nosa prioridade é achegar a protección e os recursos ás mulleres, tamén desde os espazos cotiáns da Administración, porque a violencia machista pode manifestarse en calquera momento e en calquera lugar”, subliñou Isabel Rodríguez. “A implicación do persoal destas oficinas é fundamental para seguir construíndo unha rede institucional activa, comprometida e preparada para non mirar cara a outro lado”.
Unha rede en expansión
Este novo Punto Violeta únese aos xa operativos na Subdelegación do Goberno en Lugo —nos departamentos de Estranxeiría e Rexistro—, así como nas oficinas provinciais do SEPE, da Axencia Tributaria e de Muface. A previsión é continuar ampliando esta rede de Puntos Violeta noutras sedes da Administración Xeral do Estado na provincia.
Información accesible e materiais de apoio
No Punto Violeta das oficinas do INSS estarán dispoñibles materiais informativos sobre os recursos institucionais, a forma de actuar en caso de violencia e guías que explican como identificar as diferentes formas de violencia machista. Estes materiais inclúen tamén carteis e adhesivos cun código QR que dá acceso directo á Guía Punto Violeta, elaborada polo Ministerio de Igualdade.
Esta acción forma parte da campaña de visibilización e reforzo institucional impulsada polo Goberno de España, que continúa desenvolvendo medidas para combater esta secuela social desde todos os ámbitos, reforzando o compromiso coas vítimas e co avance cara a unha sociedade libre de violencias.