El delegado do Goberno en Galicia, Pedro Blanco, participou hoxe no acto de entrega das Medallas ANFACO en Vigo, onde destacou o papel estratéxico do sector conserveiro e do mar como un dos motores económicos e socias de Galicia e como eixo fundamental do futuro innovador dunha industria galega chea de oportunidades. Blanco puxo en valor a implicación de empresas e profesionais que, co seu traballo diario, fan posible unha industria “competitiva e orgullosa das súas raíces”.
“O Goberno de España cre firmemente neste sector e está a demostrar o seu compromiso con feitos e recursos”, afirmou o delegado, quen destacou o apoio constante do Executivo de Pedro Sánchez a través de políticas públicas orientadas á dixitalización, á sustentabilidade ou á mellora da eficiencia enerxética da industria mariña.
Pedro Blanco destacou de forma especial o labor do ministro de Agricultura, Pesca e Alimentación, Luis Planas, quen “baixo o seu liderado está a traballar como nunca para acompañar ao sector conserveiro e acuícola galego neste proceso de transformación”. Neste sentido, sinalou que o Goberno considera o mar-industria unha prioridade estratéxica e que o apoio ao sector é “real, ambicioso e transformador”, cun impacto directo na xeración de emprego e riqueza de calidade.
O delegado do Goberno referiuse ao PERCHE Mar-Industria como “unha ferramenta fundamental” para garantir o futuro do sector. Subliñou que na súa resolución provisional xa foron aprobados 27 proxectos, varios deles vinculados directamente a ANFACO, e avanzou que “a resolución definitiva está próxima e traerá boas noticias para Galicia”. Pedro Blanco destacou que este PERCHE nace dunha demanda xusta do sector e do compromiso persoal do ministro Planas, cun volume de investimento sen precedentes que permitirá dar un salto cualitativo en innovación tecnolóxica e competitividade.
Durante a súa intervención, fixo tamén referencia ao recente traspaso das competencias do litoral á Xunta de Galicia, aprobado esta semana polo Consello de Ministros. Dirixíndose ao presidente da Xunta, destacou este fito como “un exemplo claro de cooperación institucional e de diálogo maduro entre administracións”. Blanco expresou o seu desexo de que ese espírito de colaboración continúe e permita avanzar cara a unha xestión eficiente e coordinada dos recursos mariños.
Por último, o delegado do Goberno agradeceu o traballo de ANFACO, especialmente do seu presidente, Iván Alonso, “cuxa visión e compromiso están a ser clave para o presente e futuro da industria conserveira galega”, e felicitou ás persoas e entidades galardoadas neste acto, con mención particular ao recoñecemento concedido ao Ministerio de Agricultura, Pesca e Alimentación “por contribuír co seu labor diario ao crecemento dunha Galicia próspera e con futuro”.