O delegado do Goberno en Galicia, Pedro Blanco; o alcalde de Vigo, Abel Caballero, e o delegado do Estado no Consorcio Zona Franca de Vigo, David Regades, abriron hoxe a que é a primeira sede institucional do Goberno de España na cidade, nunha decisión que o delegado do Goberno cualificou de “histórica” por canto cobre un “defecto coa cidade máis importante de Galicia”.
A nova oficina ocupa a sexta planta do edificio multiusos da Rúa Porto, 3. O espazo pertence ao Consorcio Zona Franca de Vigo, que cede o uso á Delegación do Goberno a través dun protocolo. Esta mañá Pedro Blanco e David Regades ratificaban o acordo na sede do Consorcio, nun acto no que asistían tamén a directora xeral do Consorcio, Inés González, e o subdelegado do Goberno en Pontevedra, Abel Losada.
Posteriormente desprazáronse ata o edificio multiusos onde percorreron a sede, que desde agora, é “o punto de referencia do Goberno de España para empresas, administracións, e para cidadanía desta cidade e desta área metropolitana”, sinalou Pedro Blanco.
Presenza do Goberno de España
Durante a visita ás instalacións, Pedro Blanco expresou o seu agradecemento a David Regades e a Abel Caballero pola sensibilidade mostrada diante deste pedimento, e pola “colaboración que atopamos sempre para completar os proxectos do Goberno nesta cidade”.
Sobre a nova sede, o delegado sinalou que “fortalece a presenza do Goberno de España en Vigo e en Galicia”. Engadiu que con ela se dá “visibilidade ao Goberno e á acción do Goberno” á vez que se consolida “a imaxe da Delegación do Goberno como unha institución aberta a toda a cidadanía de Galicia, próxima e moderna”.