El delegado do Goberno en Galicia, Pedro Blanco, destacou hoxe os importantes avances do Goberno de España “en infraestruturas craves e esenciais” para o Concello de Barreiros. O delegado analizou este luns coa alcaldesa, Ana Ermida, e coa segunda tenente de alcaldesa, Carmen Veiga, as diferentes iniciativas que o Goberno de España ten en marcha no municipio mariñán.
En este sentido, Pedro Blanco puxo en valor o compromiso do Goberno de España cos veciños e veciñas de Barreiros atendendo demandas históricas para o crecemento e a cohesión territorial. Concretamente, subliñou o proxecto para construír a nova EDAR de San Miguel de Reinante, que está a ser avaliada por técnicos do Ministerio para a Transición Ecolóxica e o Reto Demográfico, e “co que queremos dar unha resposta integral a unha problemática de moitos anos”.
Así mesmo, abordaron as melloras que está a levar a cabo o servizo provincial de costas nos areais de Barreiros, con actuacións nas praias Arealonga, San Bartolo ou Valea, entre outras.
En materia de estradas, o delegado comprometeuse a trasladar ao Ministerio de Transportes e Movilidad Urbana as alegacións do Concello ao proxecto da A-74, para que se inclúa unha ligazón que conecte a autovía da Mariña co polígono de San Cosme. “Traballamos conxuntamente, Goberno e Concello de Barreiros, en proxectos fundamentais para o presente e o futuro da vila, que melloren a calidade de vida dos barreirenses e que xeren novas oportunidades económicas para o territorio”, afirmou Pedro Blanco.