La subdelegada do Goberno nA Coruña, María Rivas, reivindicou hoxe en Oleiros a importancia de contar con mulleres referentes en traballos tradicionalmente asociados aos homes. Fixoo no marco dunhas xornadas organizadas pola Garda Civil, en colaboración co Concello de Oleiros, nas que oito mulleres integrantes das diferentes unidades do instituto armado ofreceron os seus testemuños sobre o traballo que desenvolven a diario e como viven elas a súa realidade nunha institución centenaria que empezou a incorporar ás mulleres ao seu persoal fai pouco máis de tres décadas.
“Hoxe a Garda Civil conta con máis mulleres que nunca e representan xa un de cada tres novos ingresos no corpo. Ademais, van ascendendo no corpo e non tardaremos en ver unha muller coronela ou capitá da Garda Civil”, vaticinou.
No acto, que contou coa asistencia de preto de 400 alumnos e alumnas de Secundaria dos institutos oleirenses María Casares, Miraflores, Neira Vilas e Hijas de Cristo Rey, María Rivas incidiu na importancia da presenza das mulleres neste corpo, en todos os ámbitos e especialidades.
En este sentido, a subdelegada destacou que tamén e relevante o papel do Goberno de España á hora de definir un marco normativo que favoreza e impulse as políticas de igualdade como eixo vertebrador das súas políticas públicas.
María Rivas agradeceu ás oito axentes da Garda Civil os seus testemuños nesta actividade, que se enmarca dentro dos actos con motivo do Día Internacional da Muller, que se conmemora o próximo 8 de marzo.
“É un orgullo ver o cambio que experimentou unha institución centenaria como a Garda Civil, que ata hai tres décadas non permitía o acceso das mulleres á Academia de oficiais. Son cambios que foron posibles grazas á loita que, como sociedade, levamos a cabo para devolver á muller, que representa a metade da nosa poboación, ao lugar que por dereito lle corresponde. Unha loita que non debe cesar, xa non só para seguir avanzando, senón para non retroceder en ningunha das conquistas alcanzadas”, concluíu.