A Delegación do Goberno en Galicia informa que a Dirección Xeral de Tráfico levará a cabo desde mañá, luns, ata o domingo, 23 unha nova campaña de vixilancia e control de tráfico centrada na supervisión de camións e autobuses.
A campaña, que tamén contará co apoio das diferentes xefaturas provinciais de tráfico, propón como estratexia fundamental a “tolerancia cero cos comportamentos de risco” vixiando para iso as causas concorrentes máis habituais na sinistralidade como poden ser as distraccións, a velocidade e o consumo de alcol ou outras drogas.
Durante a próxima semana os e as axentes da Agrupación de Tráfico da Garda Civil intensificarán os labores de inspección dos vehículos destinados ao transporte de mercadorías e pasaxeiros prestándolle especial atención á documentación do vehículo, á súa correcta habilitación e inspección (pneumáticos, peso, acondicionamento da carga e uso adecuado da iluminación), revisando os tempos estipulados de condución e descanso, así como os excesos de velocidade e o consumo de alcol ou drogas.
Esta campaña ten unha especial incidencia en Galicia onde, segundo os datos de febreiro deste ano do Ministerio de Transportes e Movilidad Sostenible, operan máis de 15.800 empresas de transporte de mercadorías e de autobuses (en liñas regulares e non regulares).
No que respecta á sinistralidade, desde 2020 Galicia suma tres falecidos en camións inferiores a 3.500 kg. e 8 falecidos en camións de máis de 3.500 kg. En autobuses rexistráronse 7 persoas falecidas nun accidente de autobús producido na provincia de Pontevedra no ano 2022.
Datos da campaña anterior
A última campaña especial de vixilancia e control de tráfico centrada neste tipo de vehículos celebrouse en febreiro de 2023. Naquela campaña, a Garda Civil controlou a un total de 4.238 vehículos e 653 foron denunciados, Las denuncias máis frecuentes foron por erros na documentación do vehículo (55 denuncias); problemas no chasis e accesorios (50 sancións) e exceso de peso (40 denuncias). Ademais dos 173 autobuses que pasaron os controis oportunos 33 foron denunciados (16 nA Coruña, 4 en Lugo e 13 en Pontevedra).