A subdelegada do Goberno nA Coruña, María Rivas, mantivo hoxe un encontro de traballo co alcalde de Melide, José Manuel Pérez, para tratar as medidas relacionadas coa inminente apertura do tramo da autovía A-54 entre a localidade coruñesa e a luguesa de Palas de Rei.
No encontro, ao que tamén acudiron o xefe da Demarcación de Estradas do Estado en Galicia, Anxo González do Río, e responsables da empresa encargada de executar as obras (Acciona), a subdelegada e o alcalde repasaron o avance das medidas acordadas na reunión mantida o pasado mes de novembro.
María Rivas atendeu ás demandas do Concello á vez que explicou algunha das actuacións para garantir a seguridade e facilitar o tránsito de vehículos tras a apertura deste novo tramo de autovía, coordinadas coa Garda Civil de Tráfico e a Dirección Xeral de Tráfico. Neste sentido, avanzou a recomendación de desvío para os vehículos pesados de máis de 8 toneladas pola N-547 para evitar o seu paso polo AC-840 e a eliminación dos illotes para facilitar os xiros ao tráfico pesado, así como a instalación dun sistema de semaforización intelixente na glorieta de Melide para mellorar a fluidez do tráfico.
A subdelegada, que incidiu no esforzo do Goberno para a posta en servizo dos dous tramos pendentes desta autovía, que vai ofrecer unha conexión directa entre as cidades de Santiago e Lugo, destacou a total colaboración co Concello de Melide, co que mantivo unha comunicación fluída para que a posta en marcha desta infraestrutura sexa un fito na transformación e mellora da seguridade do tráfico e da calidade de vida dos veciños e veciñas de Melide e de toda a provincia.