El subdelegado do Goberno en Pontevedra, Abel Losada, visitou as obras de asfaltado integral e de reposición de barreiras de contención que o Ministerio de Transportes está a realizar na N-541 ao seu paso polos termos municipais de Cerdedo-Cotobade e Forcarei, cun investimento moi próximo ao millón de euros.
Losada, que estivo acompañado na visita polo capitán da Agrupación de Tráfico da Garda Civil, Antonio Piteira, destacou a calidade destes traballos, que supoñen unha “mellora máis dentro dun plan de mellora constante” na vía que une Pontevedra coa provincia de Ourense.
El subdelegado destacou que se está asfaltando integralmente o tramo entre os kilométros 68 e 69,8, no termo municipal de Cerdedo-Cotobade, cun investimento de 475.499 euros IVE incluído. En paralelo está a reporse a barreira metálica de contención entre os quilómetros 55,7 e 63,4 nos termos municipais de Forcarei e Cerdedo-Cotobade, co investimento doutros 464.944 euros, IVE incluído. Ademais diso, van realizarse actuacións puntuais de reforzo de firme nas próximas semanas.
Estas actuacións veñen sumarse ao millón de euros investido nos últimos meses na ponte de Pedre, ampliando a sección do viaduto, repondo os sistemas de contención e a drenaxe e ampliando os pasos peonís peonís.
Por outra banda, lembrou Losada, o Ministerio continúa tramitando o proxecto para o asfaltado integral do tramo que discorre polo municipio de Forcarei, estimado en catro millóns de euros.
Finalmente, recomendou que, a pesar destas continuas melloras no firme é necesario circular con prudencia pola N-541, dado que as estatísticas da Dirección Xeral de Tráfico revelan que o 44% dos accidentes que se producen nesta vía débense a colisións con animais salvaxes que cruzan a calzada, moi por encima da media do 26% no conxunto da rede de estradas da provincia. Un perigo que está sinalizado en todo o percorrido da N-541.