Ponte Caldelas, 25 de novembro de 2024.- O subdelegado do Goberno en Pontevedra, Abel Losada, presentou esta mañá no IES de Ponte Caldelas un novo taller da iniciativa ′Regueifas pola Igualdade′, promovida pola Unidade de Violencia sobre a muller da Subdelegación do Goberno en Pontevedra e dirixida a escolares da provincia. Esta acción enmárcase no programa de actividades polo 25N, Día Internacional de la Eliminación de las Violencias contra as Mulleres.
Ao acto asistiron, ademais do subdelegado, a xefa da Unidade de Violencia sobre as Mulleres da Subdelegación, María José Rodríguez; o alcalde de Ponte Caldelas, Andrés Díaz; o inspector de Educación, José María Alén; o director do colexio, Iago García, e o subdirector, David Outón. En total, máis de medio centenar de alumnos e alumnas de 2ª da ESO participaron nesta actividade, impartida pola artista Lupe Blanco, e aprenderon a regueifar con letras nas que se enxalza o compromiso pola igualdade plena entre mulleres e homes e o rexeitamento activo de calquera maneira de violencia de xénero.
Estos talleres teñen por obxecto concienciar á mocidade na loita contra a violencia de xénero, fomentar a igualdade e promover a reflexión sobre diferentes temas relacionados coas violencias machistas. Despois de pasar polo IES de Cambados, de Valadares (Vigo) e Ponte Caldelas, o próximo 28 de novembro o IES Pintor Colmeiro de Silleda acollerá o último taller do programa.
"Nun momento no que proliferan os discursos que negan a existencia das violencias machistas, este tipo de iniciativas son importante para concienciar e sensibilizar á mocidade, que son e deben ser axentes activos e fundamentais do cambio”, destacou o subdelegado, que explicou que “o éxito desta actividade ten moito que ver co feito de que a disputa dialéctica improvisada encaixa moi ben co tipo de música que hoxe escoita a mocidade, á vez que ofrece os recursos da lingua galega, a nosa lingua, para divulgar ideas e conceptos relacionados coa loita permanente contra a violencia machista e a favor da igualdade plena entre mulleres e homes”.