El subdelegado do Goberno en Ourense, Eladio Santos, realizou esta mañá unha visita institucional ao Concello de Vilardevós, para coñecer xunto á súa alcaldesa, Eva Pérez, as necesidades do municipio, achegarlle información e novidades sobre axudas para o aluguer e rehabilitación de vivendas, así como interesarse pola situación de proxectos que contan con financiamento estatal, como son instalacións que melloran a eficiencia enerxética do Concello ou para o mantemento de camiños rurais.
Ao comezo da reunión o subdelegado fixo toda unha declaración de intencións, manifestando que “o Goberno de España está moi comprometido co desenvolvemento do mundo rural, para fixar poboación e economía”.
Precisamente, para facilitar a vida fóra das grandes cidades e permitir a emancipación dos menores de 35 anos, Eladio Santos achegoulle á alcaldesa información detallada da segunda convocatoria do Bono Aluguer Novo 2024, para o que o Consello de Ministros aprobou para Galicia unha achega de 11,4 millóns de euros, destinados a axudar aos máis novos ao pago dun aluguer ou no acceso a unha vivenda.
Desde a posta en marcha deste bono en 2022, o financiamento recibido pola nosa comunidade procedente do Goberno Central ascende aos 34,2 M€, o que mostra a firme aposta do mesmo por aquelas medidas que a sociedade máis necesita e, concretamente, pola xente nova, colectivo que en materia de vivenda conta con maiores dificultades.
Ademais, exemplos deste compromiso do Estado polo rural son tamén as diversas axudas que Vilardevós percibiu nos últimos tempos para proxectos de importancia para o municipio, como foron a mellora de camiños municipais de acceso a parcelas agrícolas, recibindo para iso case 60.000 euros do Fondo Europeo Agrícola de Desenvolvemento Rural; e a chegada da banda larga aos pequenos núcleos mediante o Programa ÚNICO-Banda Larga, do Ministerio de Economía, Comercio e Empresa.
Por último, subdelegado e alcaldesa falaron da importancia do Pacto de Estado Contra a Violencia de Xénero, que destinou a Vilardevós 1.800 euros para actividades relacionadas con esta problemática, que resultan chave para contribuír á concienciación social.