El delegado do Goberno, Pedro Blanco, anunciou hoxe que o Ministerio de Industria e Turismo apoiará o desenvolvemento de 10 experiencias turísticas innovadoras en Galicia con máis dun millón de euros do Plan de Recuperación.
Pedro Blanco deu conta da resolución da última convocatoria do Programa 'Experiencias de Turismo España' para deseñar e pór no mercado novos produtos turísticos en destinos alternativos e sobre a base da sustentabilidade ambiental. O delegado remarcou que, “a través destas iniciativas, Galicia verá reforzada a súa xa extensa oferta turística, gañando en calidade para atraer a novos perfís de visitantes, mellorando as experiencias e estendéndoas a todo ano”.
O Ministerio de Industria e Turismo vén de publicar a resolución destas axudas, financiadas con cargo aos fondos do Plan de Recuperación do Goberno, que reparten 19,7 millóns de euros entre 41 proxectos (7 individuais e 34 cooperativos) que beneficiarán a 230 entidades. Non caso de Galicia, son 10 os proxectos nos que participan un total de 14 empresas e entidades da comunidade e que terán impacto nas catro provincias.
Os proxectos con presenza galega son os seguintes:
• ‘Spain through its wineries’, un proxecto no que participan dez entidades, entre elas tres adegas galegas Terras Gauda, Adegas e Viñedos Vía Romana e Gargalo que suman unha axuda de 209.412 euros dun total de 687.162 euros que recibe o proxecto.
• ‘Praias sen límites’, con 123.148,78 euros para a Deputación de Pontevedra. O proxecto intégrano 5 entidades e recibe en total unha axuda de 583.385,25 euros.
• ‘Turismo Mineiro-Industrial del Carbón’. Encabezado pola fundación CIUDEN, que concentra o groso do investimento (241.500 euros), suma unha axuda de 682.500 euros a repartir entre cinco entidades, entre as que se atopa o Concello das Pontes, que recibe 88.200 euros.
• ‘Green Diving, paixón polos océanos e os mares’. A coruñesa NaugaSub SL é unha das nove empresas que integran o proxecto, cunha axuda total de 699.300 euros dos que 77.700 euros corresponden á firma galega.
• ‘Turimvi-España Interior’. A firma luguesa Bold Dixital Comms SL recibe 25.150 euros dos 228.000 euros de axuda para este proxecto que se distribúen entre as 8 entidades que o conforman.
• ‘Creación Experiencia Turismo de Encoros de España’. A Deputación de Lugo, con 127.750 euros, é unha das sete entidades beneficiarias da axuda de 700.000 euros que obtivo esta iniciativa.
• ‘Rutas de la Sidra de España’. Catro entidades forman parte deste proxecto, entre elas a Asociación Maceira e Sidra da Estrada, que recibe 40.000 dos 141.015 euros que lle outorga o Ministerio de Industria.
• ‘Rutas del Lo vin de España: Experiencias 360’. Nesta iniciativa participan un total de 22 entidades que se reparten 700.000 euros en axudas. Galicia está representada pola Asociación Ruta do Viño Rías Baixas, que leva 28.000 euros.
• ‘Spain Culinary Villages’. O Concello de Viveiro (63.500 euros) é un dos cinco concellos que integran este proxecto, que recibe 581.500 euros.
• ‘Ruta Accesible Patrimonio Industrial Pesquero’. É a iniciativa con maior peso de firmas galegas. Viajes Fisterra SLU (111.967 euros), Asociación Amicos (77.028,15) e a Fundación para a Pesca e o Marisqueo-Fundamar (116.360 euros) levan boa parte dos 591.103,59 euros de axuda, que se reparte entre as 6 entidades que conforman o proxecto, entre as que tamén se atopa a Federación Nacional de Confrarías de Pescadores.
Enlace á resolución: