Abel Losada anima ás familias da provincia a solicitar o bono social para gozar de conexión á Internet

O subdelegado do Goberno en Pontevedra, Abel Losada, anima ás familias da provincia a solicitar o novo bono social para conexión á Internet promovida polo Goberno de España. O Ministerio para a Transformación Dixital e da Función Pública vén de publicar esta semana a lista de operadores que actúan en cada Comunidade Autónoma no marco do programa UNICO Bono Social. Este bono está dirixido a axudar ás familias en situación económica vulnerable cun desconto na tarifa de conexión a internet de banda larga ultrarrápida.
En Galicia os operadores integrados no programa son Teléfonica España, Itegal Servizos TIC, Atuaxanela, Digi Spain, RCable e Telecable Comunicacións. O subdelegado animou “a todas as familias vulnerables da provincia a solicitar este Bono” e pediu a Xunta de Galicia “axilidade na tramitación destas axudas para que cheguen a todos os pontevedreses e pontevedresas que o precisen”.
Para a súa execución, o Goberno de España dotou o programa cun total de 30 millóns de euros, transferidos ás Comunidades Autónomas para que xestionen a tramitación deste Bono Social. O subdelegado explicou que, en todo caso, “todas as persoas que teñan recoñecida a condición de perceptor do Ingreso Mínimo Vital serán automaticamente cualificados como persoas integrantes dos colectivos vulnerables para os efectos deste programa de axudas”.
Cada bono dixital terá un importe máximo de 240 euros a repartir en 12 mensualidades de tal maneira que se aplicará unha minoración mensual de ata 20 euros no importe final da factura. Este investimento está enmarcada dentro da familia de programas UNICO para promover a universalidade da conectividade en España, e forma parte do Plan de Recuperación, Transformación e Resiliencia do Goberno de España, financiado pola Unión Europea a través dos Fondos NextGenerationEU.
Abel Losada subliñou a importancia de facilitar o acceso á banda larga ultrarrápida a todas as persoas “porque o acceso a internet é xa unha cuestión crave para a igualdade de oportunidades laborais e sociais, e promovemos esta medida para que ninguén quede atrás neste presente e futuro dixital por atoparse nunha situación de vulnerabilidade económica”.