El delegado do Goberno en Galicia, Pedro Blanco, celebrou o anuncio do ministro de Agricultura, Pesca e Alimentación, Luis Planas, que avanzou que a semana que vén o Goberno aprobará o decreto de bases para as axudas dirixidas a paliar os danos producidos pola enfermidade hemorráxica bovina (EHE), que serán xestionadas polas comunidades autónomas.
As axudas, de 15 millóns de euros a repartir entre os territorios, poderanse complementar coas subvencións autonómicas ou destinarse ao financiamento das vacinas, desinsectación de instalacións gandeiras e tratamentos preventivos. Neste sentido, o delegado instou á Xunta a que complemente con fondos propios esta asignación e asuma a súa responsabilidade.
Por outra banda, o delegado destacou o paso adiante que supón esta medida para frear o avance da enfermidade, que puntos danos está a causar nas explotacións galegas, e destacou o esforzo feito en investigación para contar en tan pouco tempo cunha vacina en España para esta doenza.
Para Pedro Blanco “este é un exemplo máis do compromiso do Goberno coa sanidade e o benestar animal”, un compromiso que se fai extensivo a todo o sector primario “con máis de 187 millóns de euros en axudas directas para paliar os incrementos dos custos derivados das situacións extraordinarias”, pero tamén con outras accións como a simplificación da PAC, o reforzo na aplicación da lei da cadea ou as axudas do Plan de Recuperación, que xa benefician 42.000 entidades en Galicia, a metade pequenas e medianas empresas, e que deixan máis de 54 millóns de euros a través do PERCHE Agro para proxectos nos que participan empresas galegas, destacou o delegado.