La Subdelegación do Goberno coordina os dispositivos de seguridade das festas de verán de Vilagarcía

A subdelegada accidental do Goberno en Pontevedra, María Isabel Alonso de Linaje, copresidiu esta mañá a Xunta Local de Seguridade en Vilagarcía de Arousa, xunto o alcalde da localidade, Alberto Varela. Tamén asistiu a tenente de alcalde, Tania García, o inspector da Policía Nacional, Luis Ortiz, o tenente da Garda Civil de Tráfico, Alfonso Cuadrado e outros responsables da Policía Local e do corpo de municipal de emerxencias. O encontro tivo o fin de coordinar o operativo de seguridade para as festas de verán na cidade, especialmente para a Festa da auga, que terá lugar o 16 de agosto, e para o Combate Naval, que se celebrará o día 24 deste mesmo mes.
Desde a Subdelegación do Goberno ofreceuse a máxima colaboración para garantir a seguridade na localidade durante o mes de agosto e, particularmente, no desenvolvemento destes dous festexos principais.
Así, o Corpo Nacional de Policía reforzará a súa presenza durante os días 15 e 16, contando coa colaboración dunha patrulla da Unidade de Intervención Policial de Vigo. A Garda Civil de Tráfico realizará durante a Festa da auga controles de circulación e operativos especiais nos accesos á localidade e intensificará os controis de alcoholemia e drogas a modo de prevención pola posible falta de responsabilidade dalgúns condutores.
Os axentes da Policía Local velarán tamén por garantir o bo desenvolvemento das actividades festivas con reforzo das patrullas e controis de tráfico. Tamén se mobilizarán diversas ambulancias e un equipo sanitario de emerxencia, que se situará na Praza da Pescadería.
Por outra banda, desde a Subdelegación valorouse moi positivamente que o Concello volva dispor durante os festexos dun Punto Violeta para ofrecer información, asesoramento e axuda ante calquera tipo de agresión machista.