La alcaldesa de Lugo, Paula Alvarellos, anunicou esta mañá que Lugo contará cunha nova comisaría de Policía Nacional. “Como xa saben, o Goberno local ofreceu hai meses ao Ministerio dúas parcelas que reúnen as características necesarias para acometer a nova edificación da comisaría conforme aos estándares marcados pola División Económica e Técnica da Policía Nacional. Destas dúas parcelas propostas, a elixida finalmente está situada no barrio de Abella”, sinalou a rexedora nunha comparecencia na que estivo acompañada polo delegado do Goberno en Galicia, Pedro Blanco; pola subdelegada en Lugo, Isabel Rodríguez, así como polo Xefe Superior da Policía Nacional en Galicia, Ramón Gómez Nieto, e o Comisario Provincial.
Se trata dun terreo na rúa Orquídea, en concreto na súa confluencia con Aquilino Iglesia Alvariño. O terreo ten unha extensión de 2.117 metros cadrados e está catalogado como chan para equipamento. “Deste xeito, cumprimos o noso compromiso de levar a nova comisaría á zona norte da cidade. Compromiso que foi adquirido cos colectivos veciñais destes barrios e que para nós era inquebrantable. Levamos anos traballando coordinadamente co Goberno central para que a nosa cidade conte cunha nova sede da Policía Nacional adaptada aos estándares do século XXI e que poida atender as necesidades e demandas tanto das e dos efectivos deste Corpo como da cidadanía”, proseguiu Alvarellos.
Pola súa banda, o delegado do Goberno en Galicia, Pedro Blanco, lembrou que a comisaría de Lugo é unha obra prioritaria para o Executivo central. “Hoxe é un punto de partida. Non hai volta atrás. Trátase dun reto ambicioso no que non imos escatimar nin esforzos, nin recursos”, indicou Blanco, que destacou a óptima stiuación da parcela para albergar esta nova sede xa que, segundo valoraron os técnicos, dispón de acceso fácil e cómodo para as persoas usuarias e de comunicación rápida e áxil para a prestación dos servizos policiais ligados á seguridade cidadá.
“Superamos así anos de atrancos e de marchas atrás que non se merecen esta cidade nin moito menos a Policía Nacional. Apostamos por un edificio novo e non por solucións peregrinas que pasaban por reformas de edificios doutras administracións. Un parche que non fixeron en case 20 anos. A que hoxe presentamos é unha solución de futuro e de consenso, que depende soamente destas administracións que hoxe estamos aquí representadas”, concluíu Blanco, quen agardeció a implicación da anterior alcaldesa, Lara Médez e felicitou a actual, Paula Alvarellos, por dar solución a este asunto en só un mes no cargo, "o que pon de manifesto a súa valía para alcanzar todas as metas dos lucenses”, dixo.
Antes de finalizar, Alvarellos Fondo manifestou que a súa vontade de que o novo proxecto sexa unha reralidad no menor tempo posible. “Agora mesmo estamos a estudar que fórmula é a máis áxil para realizar o trámite de cesión e pór este terreo a disposición do Ministerio para que así a nova comisaría de Abella poida ser incluída no Plan de Infraestruturas para a Seguridade do Estado vixente e comezar canto antes o proceso de licitación deste tan necesario proxecto”, dixo.
Tanto a rexedora como o delegado agradeceron a colaboración e o compromiso mostrados en todo momento polo Ministerio así como o esforzo investido por parte da xefatura da División Económica e Técnica da Policía Nacional para que este obxectivo tome forma. Ambos tiveron palabras de recoñecemento para o Xefe Superior da Policía Nacional en Galicia, Ramón Gómez Nieto, e para o Comisario Provincial, Luis Romera. “Sen dúbida, hoxe é un gran día para a cidade”, concluíu Alvarellos.