El subdelegado do Goberno en Pontevedra, Abel Losada, celebrou hoxe cos axentes da Comisaría de Vigo-Redondela o bicentenario do Corpo Nacional de Policía. Na súa visita puxo en valor “o seu traballo e a súa profesionalidade” aspectos, afirmou, recoñecidos tamén por todos e cada un dos cidadáns destas localidades.
Acompañado polo comisario, Ramiro Gómez, Abel Losada saudou aos efectivos en servizo aos que lles agradeceu o compromiso mostrado “para facer de Vigo unha cidade moi segura para a súa xente e os seus visitantes”.
“A Policía segue sendo -co seu traballo diario a pé de rúa- a garantizadora da defensa e da seguridade da cidadanía”, afirmou o subdelegado, á vez que puxo de relevo “a capacidade de adaptación do corpo ante os novos tempos e os novos tipos de delincuencia como os que se producen na rede”.
Precisamente, o subdelegado enxalzou o traballo do Corpo Nacional de Policía como un valor con distintas perspectivas, entre as que destacou o “compromiso ético, para garantir a seguridade de todos e todas sen que caiba ningunha discriminación por razón de nacionalidade, raza, sexo, xénero ou orientación sexual” e, en segundo lugar, a seguridade “como un valor económico cada vez máis importante nun mundo cambiante no que as ameazas son cada vez máis cambiantes e globais”. “É aquí onde a Policía demostra a súa capacidade de adaptación a ese mundo cambiante, con novas formas de delincuencia, novos riscos e ameazas e é aquí onde os cidadáns e cidadás atopamos a protección para vivir en liberdade”, engadiu.