El delegado do Goberno en Galicia, Pedro Blanco, puxo en valor o papel do movemento veciñal lucense e galego como factor para sacar adiante proxectos que melloren a calidade de vida dos veciños e veciñas. “A unión da veciñanza”, indicou, “permite avanzar na mellora dos servizos públicos, das comunicacións, da igualdade e da inclusión social”.
Pedro Blanco participou esta mañá en Lugo na entrega dos X “Premios Creer no Movemento Veciñal” que organiza a Confederación Galega de Asociacións Veciñais ‘Rosalía de Castro’ (CoGAVe), unha organización que está integrada por sete federacións veciñais das catro provincias.
Para o delegado “o acto é un recoñecemento ao traballo que fan os homes e mulleres das asociacións de veciños e veciñas de parroquias, vilas e cidades de Galicia, que son auténticas escolas de cidadanía”, á vez que chamou ao seu diálogo e colaboración coas administracións públicas. Nesta liña o delegado do Goberno asegurou que “é a unión da veciñanza e da administración local que a dirixe, representada aquí na súa alcaldesa, Lara Méndez, a forza impulsora da transformación que está a vivir Lugo, unha cidade que vai contar, agora si, cunha estación de tren á altura da súa xente e desta provincia”.
Finalmente, Pedro Blanco felicitou o COGAVE e á Federación Veciñal de Lugo e deulles os parabéns a todas e todos os premiados, destacando a distinción entregada ao xeral xefe da Garda Civil en Galicia, Miguel anxo Arias “pois se falamos de calidade de vida, debemos facer mención a seguridade que garanten as Forzas e Corpos de Seguridade”.