O delegado do Goberno en Galicia, Pedro Blanco, reafirmou o compromiso do Goberno de Pedro Sánchez co turismo e a cohesión territorial en Galicia, que nO Grove se traduce en 3,5 millóns de euros de investimento entre os dous proxectos estatais para transformar o turismo dos que forma parte. Por unha banda, o programa ‘Sanxenxo-O Grove polos turísticos intelixentes’, contou con 1,4 millóns de investimento, mentres que o Plan de Sustentabilidade Turística da Mancomunidade do Salnés, no que participa O Grove, conta con outros 2,11 millóns.
Desde 2020 o Goberno impulsou 34 Plans de Sustentabilidade Turística en Destino e diversas actuacións de cohesión entre destinos en Galicia cun investimento de 85,7 millóns. O Goberno de Pedro Sánchez aposta pola modernización e transformación do turismo de Galicia, con 200 millóns de euros de investimento global desde 2020 e ata este ano 2023.
Pedro Blanco participou na LX Festa do Marisco e durante o percorrido polos postos de venda de marisco e peixe, que realizou acompañado do alcalde, José Cacabelos, mostrou o apoio do Goberno para que o evento sexa declarado de Interese Turístico Internacional. “Esta festa conta con todos os ingredientes necesarios para esta distinción e con todo o apoio do Goberno para seguir crecendo como gran escaparate da Ría de Arousa e dos seus principais alicerces económicos: o turismo e o sector pesqueiro”, sinalou.
En esta liña, explicou que “o Concello leva tempo traballando intensamente na elaboración dun expediente amplo e competitivo”, polo que se mostrou convencido de que “a edición do ano 2024 inaugurarase xa con este recoñecemento”.
Para o delegado do Goberno, a Festa do Marisco “constitúe un produto turístico en si mesmo, que é o claro exemplo da desestacionalización do sector nun municipio que demostra que é moito máis que sol e praia”. Así, puxo de relevo que “turismo e pesca van da man neste evento, que tamén demostra que a Ría de Arousa é unha das máis produtivas de Galicia”.