A secretaria de Estado de Turismo do Ministerio de Industria Comercio e Turismo, Rosana Morillo, e o delegado do Goberno en Galicia, José Miñones, realizaron esta mañá unha visita institucional ao Concello de Lugo e mantiveron un encontro coa alcaldesa, Lara Méndez, no que analizaron o impacto dos plans de sostenibilidade turística na cidade. Na reunión participou tamén a subdelegada en Lugo, Isabel Rodríguez. Os asistentes coincidiron en valorar o impulso extraordinario á modernización do sector turístico da cidade que supón a inxección de dous millóns de euros do Goberno para transformar a Fábrica da Luz nun centro de enogastronomía na ribeira do Miño, grazas á convocatoria de proxectos de sustentabilidade turística que financia o Plan de Recuperación do Goberno. Rosana Morillo reafirmou o compromiso do ministerio e concretou que investimentos do Goberno no turismo de Galicia alcanza xan os 144 millóns de euros desde 2020 dentro do Plan de Recuperación.
O Plan de Sustentabilidade Turística en Destino “Et edendo lupus: un percorrido histórico pola enogastronomía” está romovido polo Concello de Lugo e ten un orzamento de 2.000.000 euros, que achega o Ministerio de Industria, Comercio e Turismo con cargo aos fondos do Plan de Recupeación. Con este proxecto búscase a recuperación na ribeira do Miño do edificio Fábrica da Luz para a creación do centro de enogastronomía. Levaranse a cabo distintas accións coa finalidade de adaptar a estrutura ao cambio climático, centrándose na envolvente do edificio realizando a reforma con técnicas de arquitectura bioclimática.
Este plan é un dos 16 proxectos aprobados para Galicia na Convocatoria extraordinaria 2022 de Plans de Sostenibilidade, que inclúe 13 plans de sustentabilidade turística e tres actuacións de cohesión territorial. En total beneficiaranse destes plans preto de 100 concellos de Galicia. O Ministerio ten xa aberta a convocatoria extraordinaria de 2023, na que o delegado animou a todas as entidades locais a participar para seguir avanzando na modernización do sector turístico de Galicia.
A secretaria de Estado e delegado tamén trasladaron á alcaldesa a oportunidade das axudas para a rehabilitación de Patrimonio Cultural (BIC), unha convocatoria na que o Concello de Lugo poderá solicitar ata tres millóns de euros para financiar a creación do Museo da Romanización no cuartel de San Fernando. Ademais, Rosana Morillo confirmou que o Goberno está traballar para dar resposta ao pedimento de declarar Festa de Interese Internacional o Arde Lucus.
Convocatoria de 2023
José Miñones e Rosana Morillo felicitaron a alcadesa pola consecución de fondos estatais para impulsar o turismo en Lugo e instárona a continuar solicitando financiamento na convocatoria deste ano dos plans de sustentabilidade turística, xa aberta.
Subliñaron o ánimo extraordinario do Goberno de Pedro Sánchez está a dar á modernización dos destinos turísticos de Galicia con investimentos que suman 85,7 millóns de euros en 34 proxectos de sustentabilidade turística nas dúas convocatorias xa resoltas, que impactan na totalidade do territorio galego: “É o Goberno de Pedro Sánchez o que impulsou na crise do COVID a figura dos Plans de Sustentabilidade Turística e é este Goberno o que, coa colaboración do resto de administracións, co liderado da ministra Reyes Maroto, e coa oportunidade histórica dos fondos Next Generation, está á promover por todo o territorio”, sinalou.