O delegado do Goberno en Galicia, José Miñones, anunciou esta tarde en Forcarei (Pontevedra) un investimento de 4 millóns de euros para a conservación da estrada N-541. O delegado visitou o municipio acompañado pola secretaria xeral de Coordinación Territorial do Ministerio de Política Territorial, Miryam Álvarez Páez, para presentarlle á alcaldesa, Verónica Pichel, os programas e investimentos do Goberno. “Unha vez máis, comprobamos que as infraestruturas de Galicia son unha prioridade para o Goberno”, valorou José Miñones, e lembrou que desde 2019 o Goberno investiu en Galicia máis de 552 millóns de euros para o mantemento e mellora da seguridade viaria da Rede de Estradas do Estado, dos que 191,5 millóns de euros foron destinados ás estradas estatais da provincia de Pontevedra.
“O Goberno de Pedro Sánchez está a realizar un esforzo histórico para mellorar a rede viaria de Pontevedra e de Galicia”, valorou José Miñones. O delegado e a secretaria xeral expuxéronlle á alcaldesa os avances do proxecto e concretaron que o Ministerio de Transportes, Movilidad e Agenda Urbana (Mitma) actuará no tramo de 17 quilómetros que ao seu paso atravesa todo o municipio de Forcarei, entre os puntos quilométricos 51 e 68. La obra, que permitirá mellorar o firme da estrada, está xa en supervisión e prevese que se licite neste primeiro semestre do ano. Este compromiso responde á demanda que xa lle trasladou a alcaldesa ao delegado na súa primeira visita ao Concello.
Ademais, o delegado corroborou o compromiso do Goberno para atender a demanda do Concello de Forcarei de mellorar as condicións da vía no cruzamento de Ventoxo. Informou de que se trasladará unha orde de estudo para redactar este mesmo ano o proxecto. Este compromiso tamén responde as demandas trasladadas por Verónica Pichel a José Miñones na súa primeira visita institucional a Forcarei, atendendo os pedimentos dos veciños e veciñas da zona, con quen o Concello traballou sempre da man.
Durante a súa visita ao Concello de Forcarei, o delegado en Galicia e a secretaria xeral de Coordinación Territorial tamén trasladaron a utilidade do programa ‘A Administración Preto de Ti’ , co que o Goberno chegou xa a 146 concellos de Galicia desde que se puxo en marcha o pasado novembro. Esta iniciativa piloto do Ministerio de Política Territorial, que forma parte do Plan de Recuperación, Transformación e Resiliencia, ten como obxectivo achegar a Administración Xeral do Estado (AGE) ao territorio e facilitar aos cidadáns que viven no medio rural o acceso aos servizos públicos sen necesidade de desprazarse a outras localidades.
A secretaria xeral de Cooperación Territorial anunciou hoxe que ‘A Administración preto de ti’ do Goberno sumará a Seguridade Social e o Servizo Estatal Público de Emprego (SEPE) aos procedemos que achega á poboación dos pequenos municipios.