O delegado do Goberno en Galicia, José Miñones, destacou hoxe en Santiago o compromiso do Goberno coa mellora dos servizos municipais, con 3,32 millóns de euros para rehabilitar dous centros deportivos a través do Programa de Impulso á Rehabilitación dos Edificios Públicos (PIREP). “O Plan de Recuperación do Goberno chega a Santiago para mellorar a calidade de vida da súa veciñanza”, subliñou José Miñones. En concreto, o Goberno financia con 2,3 M€ a reforma integral do complexo deportivo Santa Isabel e con preto dun millón a obra do polideportivo de Vite. Ambas as instalacións, de titularidade municipal, resultaron beneficiarias na recente resolución da Liña 1 do PIREP Local, o programa de axudas co que o Ministerio de Transportes, Movilidad e Agenda Urbana (Mitma) concedeu de 27,3 millóns de euros a concellos galegos e deputacións para a rehabilitación de 36 edificios públicos da súa titularidade. Santiago foi o municipio galego que máis fondos recibiu.
O delegado do Goberno visitou o complexo deportivo de Santa Isabel acompañado polo alcalde, Xosé Sánchez Bugallo, con quen repasou as distintas liñas de acción do Executivo central. “Con Pedro Sánchez no Goberno de España e con Xosé Sánchez Bugallo na alcaldía, Santiago captou 300 millóns de euros de investimento”, valorou o delegado. Na visita participou tamén a subdelegada nA Coruña, María Rivas.
La obra de Santa Isabel recibe unha axuda do Goberno de 2.340.149 euros e ten un custo total de 2.975.903 euros. Permitirá mellorar a eficiencia enerxética, a sustentabilidade, a accesibilidade, a habitabilidade, a seguridade e a conservación deste complexo deportivo.
Pola súa banda, a rehabilitación do polideportivo municipal de Vite recibe 979.278 euros do PIREP para un proxecto que ascende a 1.325.277 euros. A actuación contempla o cambio da cuberta exterior, o tellado, todos os elementos de impermeabilización, luz, auga e servizos. “Son os veciños e veciñas de Santiago os principais beneficiados desta obra”, sinalou José Miñones.
Santiago tamén se beneficiou da liña autonómica do PIREP, cunha inxección de 3,86 millóns de euros transferidos á Xunta de Galicia para a rehabilitación do CEIP Mestre Rodríguez Xixirei e o IES Lamas de Abade. O delegado engadiu que proximamente o Ministerio resolverá a concesión da Liña 2 do PIREP Local, que permitirá aos concellos seguir avanzando na mellora dos edificios públicos.
300M€ de investimento do Goberno en Santiago
En suma, os investimentos do Goberno no municipio de Santiago roldan actualmente os 300 millóns de euros. Entre as principais actuacións están a estación intermodal, a ligazón Orbital, o Orbitaliño, o cuartel da Garda Civil, a depuradora e as inxeccións para potenciar o turismo. “O compromiso do Goberno de España cos concellos é firme e estase traducindo en investimentos e melloras palpables dos servizos públicos en Santiago de Compostela”, concluíu José Miñones.