O delegado do Goberno en Galicia, José Miñones, reafirma o compromiso do Goberno de Pedro Sánchez coa modernización dos destinos turísticos de Galicia e, en concreto, co impulso á promoción turística da comarca de Ferrolterra, na que o Executivo financia tres proxectos dos que se beneficia o Concello de Valdoviño. Trátase de Rede de Pobos do Surf, incluída nos Plans de Sustentabilidade Turística en Destino (PSTD) do Ministerio de Industria, Comercio e Turismo; o proxecto de dinamización turística e comercial; e o Xeoparque do Cabo Ortegal. O delegado mantivo un encontro co alcalde de Valdoviño, Alberto González, na Feira Internacional de Turismo (FITUR) en Madrid, para abordar estes investimentos e coñecer os proxectos futuros da localidade en materia turística. “O Plan de Recuperación chega a Ferrolterra, chega a Valdoviño e chega ás súas empresas”, valorou José Miñones.
“O Goberno de Pedro Sánchez impulsou os Plans de Sustentabilidade Turística e está a traballar en colaboración con do resto de administracións, co liderado da ministra Reyes Maroto, para aproveitar a oportunidade histórica dos fondos Next Generation. Estamos a transformar o sector do turismo en Galicia cun modelo máis sustentable e competitivo grazas ao Plan de Recuperación do Goberno”, sinalou José Miñones. O delegado ejemplificó esta transformación no caso de Valdoviño, que se beneficia dos seguintes investimentos en materia de turismo:
Rede de Pobos do Surf: A mancomunidade de concellos da comarca de Ferrol, na que se integran Ferrol e Valdoviño; a localidade de Carballo; e os municipios de Getxo (Euskadi), Ribamontán ao Mar (Cantabria) e Castrillón (Asturias) construirán unha Rede de Pobos do Surf cunha importante axuda económica do programa “Experiencias Turismo España”. A subvención ascende a preto de medio millón de euros por parte do Ministerio de Industria, Comercio e Turismo, o que permitirá afrontar este ambicioso proxecto turístico co respaldo dos fondos europeos Next Generation, e que liderará a propia mancomunidade.
O proxecto contempla a creación de novos produtos turísticos ligados a actividades sustentables tematizadas (Surf e patrimonio cultural; Surf e Lecer en Familia, e Surf e Gastronomía), tendentes á desestacionalización do turismo nos respectivos territorios. Esta é, precisamente, unha das actuacións concretas da rede, así como outras como: a creación dunha imaxe de marca propia; a posta en marcha dunha web corporativa de Pobos do Surf e perfís nas diferentes redes sociais; campañas de divulgación e sensibilización a través das redes e de promoción en medios de comunicación; deseño e execución de formación en liña para a mellora da competitividade do sector turístico vinculado ao surf respecto á enerxía e dixitalización, e deseño e execución de xornadas de asesoramento para a posta en marcha de novos negocios ou liñas de servizos.
Así mesmo, escolas de surf, surf camps, tendas especializadas, xapers (fabricantes artesáns de táboas de surf), empresas provedoras de material, empresas de aloxamento e restauración, empresas de organización de eventos deportivos, así como outros operadores turísticos relacionados beneficiaranse especialmente do proxecto a través da participación directa nas accións propostas e como beneficiarios indirectos do desenvolvemento sustentable do turismo de surf. En esta liña, estímase a existencia dunhas 120 empresas específicas ligadas ao surf no conxunto das entidades locais que promoven a iniciativa.
Neste contexto, o alcalde trasladou ao delegado o proxecto elaborado polo Concello de Valdoviño para acoller o centro de tecnificación do surf nun futuro.
Fortalecemento da actividade comercial en zonas turísticas da provincia da Coruña. A Deputación da Coruña recibe unha axuda de 692.237 euros do Ministerio de Industria, Comercio e Turismo para implantar un proxecto de mellora da dinamización comercial e zonas turísticas de forma integrada a través da cooperación intermunicipal dos concellos de Betanzos, Pontedeume e Valdoviño. Este financiamento permite pór en marcha unha experiencia de produto turístico que relacione comercio e turismo tendo en conta a súa estreita relación e posibilidade de sinerxia.
O proxecto permitirá identificar as relacións existentes entre espazos turísticos e comerciais, analizando as sinerxias socioeconómicas e propostas estratéxicas conxuntas que permitan dinamizar espazos emblemáticos, mellorar o uso de locais comerciais, ampliar a oferta turística, fomentar a colaboración sectorial, incrementar as vendas do comercio e en definitiva mellorar a competitividade turística-comercial.
Xeoparque do Cabo Ortegal. José Miñones trasladou ao alcalde “todo o respaldo do Goberno de España” ao proxecto impulsado polos concellos de Cariño, Cedeira, Cerdido, Moeche, Ortigueira, San Sadurniño e Valdoviño, que integran a Asociación para a xestión do Xeoparque do Cabo Ortegal. “Cabo Ortegal conta con todas as características necesarias para lograr o recoñecemento internacional como geoparque e estou seguro de que os auditores da Unesco están a comprobalo”, afirmou. O Ministerio de Industria, Comercio e Turismo concedeu 1,5 millóns de euros para o desenvolvemento do plan do Proxecto de Xeoparque do Cabo Ortegal na primeira convocatoria extraordinaria dos do Programa de Plans de Sustentabilidade Turística en Destino, no marco do Plan de Recuperación.