O Consello de Ministros aprobou a modificación de catro reais decretos que regulan subvencións en materia turística no marco do Plan de Recuperación, Transformación e Resiliencia. O obxectivo é flexibilizar os requisitos para contribuír a unha maior e mellor consecución das finalidades perseguidas polas subvencións.
En concreto modifícanse o reais decreto 1074/2021, do 7 de decembro; 1118/2021, do 21 de decembro; 449/2022, do 14 de xuño, e 1011/2022, do 5 de decembro.
As modificacións afectan a medidas para fomentar a resiliencia turística en Baleares, Canarias, Ceuta e Melilla. En concreto, amplíase o prazo para a execución das actuacións ata o 30 de xuño de 2025. Así mesmo, increméntase a porcentaxe de subcontratación posible das actuacións financiadas ata o 100%.
Ademais, flexibilízase o réxime de modificación dos convenios nos que se plasma o detalle das actuacións financiables, co fin de permitir unha mellor adaptación da oferta de axudas á realidade da demanda destas por parte dos potenciais beneficiarios. Respecto das subvencións destinadas ao financiamento de proxectos sustentables de mantemento e rehabilitación do patrimonio histórico con uso turístico, o RD aprobado hoxe permitirá a modificación do contido da resolución de concesión da subvención, a posibilidade de subcontratación ata o 100% e a ampliación do prazo de execución das axudas ata o 30 de xuño de 2026. Esta modificación afecta os proxectos presentados polas cidades Patrimonio da Humanidade, entre outros destinos.