12 de febreiro de 2024.- Entre os días 22 e 26 do pasado mes de xaneiro, a Dirección Xeral de Tráfico levou a cabo unha das súas habituais campañas de vixilancia e control centrada nesta ocasión nos vehículos dedicados ao transporte escolar e de menores, co fin de comprobar que estes cumpren a normativa establecida para este tipo de transportes.
Durante os cinco días que durou a campaña, 387 vehículos foron controlados polos axentes da Agrupación de Tráfico da Garda Civil de Castela e León e, deles, un de cada tres (121 vehículos) foi sancionado cun total de 208 denuncias formuladas.
Como é habitual, as irregularidades administrativas son as que maior número de denuncias xeraron, entre elas, 78 por non dispor da autorización especial para realizar transporte escolar e 35 por non ter subscrito un seguro de responsabilidade ilimitada, tal e como esixe a lei.
Respecto do uso do cinto de seguridade naqueles vehículos que os levan incorporados, nas inspeccións realizadas polos axentes constatouse que tan só en 1 vehículo dos que dispuñan destes sistemas de retención non se facía uso deles por presentar anomalías no seu funcionamento.
É importante destacar tamén o feito de que ningún dos condutores de transporte escolar controlados durante a campaña deu positivo nos controis preventivos de alcol e drogas realizados polos axentes. Tampouco se sanciono a ningún condutor por incumprir os límites de velocidade establecidos.
OUTRAS INFRACCIÓNS
Os axentes da Agrupación de Tráfico da Garda Civil tamén comprobaron que 4 vehículos de transporte escolar presentaban deficiencias nas portas de servizo e emerxencias, así como nos seus dispositivos de accionamiento e outros 7 foron denunciados por non ter ao día a Inspección Técnica de Vehículos.
No que se refire á sinalización obrigatoria que este tipo de vehículos deben levar, 14 dos vehículos controlados non levaban o correspondente sinal V-10 de transporte escolar e outros 5 carecían do dispositivo luminoso con sinal de emerxencia.
Ademais, 1 condutor foi denunciado por non levar a bordo do autocar unha persoa encargada do coidado dos menores cando así procedía e ningún condutor foi denunciado por exceso de tempo de condución ou minoración do descanso.