30 de outubro de 2023.- A subdelegada do Goberno, Marian Rueda, visitou a Xefatura Provincial de Inspección de Telecomunicacións, acompañada do seu máximo responsable, José Antonio Flores.
A subdelegada percorreu as instalacións deste servizo, integrado no Ministerio de Asuntos Económicos e Transformación Dixital e que ten como principal cometido atender aos asuntos relacionados coa utilización do espectro radioeléctrico.
Deste xeito, a Inspección de Telecomunicacións encárgase da comprobación técnica de emisións radioeléctricas para identificar, localizar e eliminar interferencias, observar posibles infraccións, irregularidades e perturbacións dos sistemas de radiocomunicación.
Así, atende as reclamacións por interferencias que recolla dos usuarios, encárgase de mediar os niveis de emisións radioeléctricas e de comprobar as coberturas de servizos como a televisión ou a telefonía móbil.
Outras das actividades nas que centra o seu labor é a tramitación e autorizacións do uso especial do espectro radioeléctrico por radioaficionados; a tramitación de autorizacións para uso privado deste espectro (servizo fixo e fixo e móbil de banda estreita); o estudo e análise de proxectos para estacións de telefonía móbil e de redes bucle de aboado por radio, para a súa aprobación; a tramitación de expedientes de estacións de radio e televisión; de autorizacións de estacións de ampliación de cobertura de televisión dixital terrestre; ou a inspección técnica previa cando sexa necesaria para a autorización da posta en servizo de estacións de telefonía móbil, bucle de aboado por radio, radiodifusión sonora e televisión, así como outorgar esta autorización.