O Ministerio de Cultura, a través da Dirección Xeral do Libro, do Cómic e da Lectura, organiza do 11 ao 13 de setembro, o XL Encontro de Escritores e Críticos das Letras Españolas, que se celebra no Casarón de Verines (Asturias). Realizadas en colaboración coa Universidade de Salamanca, as xornadas levan por título ‘Corenta anos de creación e diálogo. En busca da diversidade: pasado e futuro duns encontros’.
A inauguración dos encontros, presidida pola directora xeral do Libro, do Cómic e da Lectura do Ministerio de Cultura, María José Gálvez, tivo lugar onte nA Libraría de Pimiango (Concello de Ribadedeva, Asturias).
Durante tres días, unha vintena de autores e críticos literarios debaterán sobre diferentes cuestións relacionadas coa creación literaria nas diferentes linguas do Estado. Concretamente, participarán nesta edición Luís García Jambrina, que exerce a coordinación académica das xornadas, Antonio Álamo, Sebastià Alzamora, Bernardo Atxaga, Anna Ballbona, Carmen Camacho, Berta Dávila, Ana Galvañ, Jon Kortazar, Eduard Marco Escamilla, Xaime Martínez, Ricardo Menéndez Salmón, Ana Merino, Antonio Orejudo, Azahara Palomeque, Berta Piñán, Noemí Sabugal, Ángela Segovia, Jordi Sierra i Fabra e Suso de Toro.
Catro décadas de encontros
Os Encontros de Escritores e Críticos das Letras de Verines celébranse desde o ano 1985. O seu obxectivo é propiciar o intercambio intelectual entre escritores de todas as linguas do país e debater sobre o estado das letras españolas nos seus distintos xéneros e desde diferentes perspectivas.
Ao longo destes 40 anos, nos encontros participaron máis de 500 escritores españois, hispanoamericanos e europeos, incluíndo poetas, novelistas, dramaturgos, ensaístas, autores de literatura infantil e xuvenil, autores de cómic, tradutores, críticos, editores, ilustradores, historietistas e xornalistas.