O ministro de Política Territorial e Memoria Democrática, Anxo Víctor Torres, e o conseller de Presidencia da Generalitat de Cataluña, Albert Dalmau, acordaron no seu encontro desta mañá reunir a Comisión Bilateral e a Comisión Mixta de Transferencias con Cataluña o próximo 24 de febreiro.
Impúlsanse así as reunións das comisións entre o Goberno de España e a Generalitat de Cataluña “para a aprobación de novos traspasos e avanzar no desenvolvemento do Estatut, a ampliación do autogoberno e a cooperación entre as dúas administracións públicas”, subliñou o ministro.
Tamén acordaron a reunión das comisións de Infraestruturas e de Asuntos Económicos e Fiscais no mes de febreiro.
O ministro Torres destacou xunto ao conseller Damau que os equipos do Goberno de España e da Generalitat manteñen distintas reunións de traballo “co obxectivo de avanzar na cogobernanza, impulsar a cooperación e o desenvolvemento autonómico e a normalización de relacións entre ambas as administracións”.
Novos traspasos a Cataluña
O ministro Torres abordou co conseller Dalmau os novos traspasos a Cataluña que se abordarán o mes que vén, e que están relacionados con educación, xustiza, medio ambiente e máis financiamento para servizos esenciais.
Segundo o calendario adiantado polo ministro e o conseller, as comisións entre o Goberno de España e a Generalitat de Cataluña ponse en marcha nos próximos días: o 17 de febreiro reunirase a comisión de Infraestruturas, o 24 de febreiro reuniranse a Comisión Bilateral e de Cooperación e a Comisión Mixta de Transferencias e a última semana de febreiro a Comisión para Asuntos Económicos e Fiscais.