O ministro de Política Territorial e Memoria Democrática, Anxo Víctor Torres, tendeu a man a todas as formacións políticas para o acordo e reclamou lealdade, ser construtivos e apartar a rifa gratuíta.
Na súa comparecencia no Congreso dos Deputados, que fixo a pedimento propio para explicar as liñas xerais do seu departamento en materia de Política Territorial, Anxo Víctor Torres compartiu unha reflexión sobre “a escenificación permanente do desacordo, que só provoca unha visión desenfocada da realidade e do interese xeral”.
Torres destacou que, aínda que no foco de atención nacional aparezan máis os desencontros entre partidos políticos, entre o Goberno e as comunidades autónomas están a alcanzarse máis acordos que en épocas anteriores e reducindo a conflitividade, a pesar de que os gobernos sexan de diferente signo político.
O ministro puxo como exemplo os acordos alcanzados en decembro sobre a Lei 7/2023 de Protección dos Dereitos e o Benestar dos Animais, con Estremadura “sen necesidade de chegar ao Tribunal Constitucional”. O máximo responsable de Política Territorial lembrou que as diferenzas sobre esta lei reflectíronse en grandes titulares. En cambio, tras o acordo, pregúntase “onde estiveron as noticias celebrando o acordo entre gobernos de distinto signo?”
Torres entende que o disenso é inherente a unha sociedade democrática, pero considera que se debe evitar a rifa, en ocasións gratuíta, e a escenificación do desacordo para obter rédito político.