O secretario de Estado de Política Territorial, Alfredo González, presidiu hoxe por videoconferencia a reunión da Comisión Mixta de Transferencias Administración Xeral do Estado-Comunidade Autónoma de Galicia, que acordou a cesión do rendemento do Imposto sobre o depósito de residuos en vertedoiros, a incineración e a coincineración de residuos con efectos desde o 1 de xaneiro 2023.
A Comisión Mixta de Transferencias, que non se reunía desde 2009, alcanza este primeiro acordo con Galicia dos últimos trece anos, coa cesión á Xunta da xestión deste imposto, co que “o Goberno reafirma o seu compromiso de diálogo permanente e cooperación institucional con todas as comunidades autónomas”, asegurou Alfredo González.
En consecuencia, o Goberno remitirá ás Cortes Xerais o anteproxecto de lei de modificación da Lei 17/2010, do réxime de cesión de tributos do Estado á Comunidade Autónoma de Galicia e de fixación do alcance e condicións da esta cesión.
A representación da Comunidade Autónoma de Galicia estivo encabezada polo vicepresidente primeiro e conselleiro de Economía, Industria e Innovación, Francisco Conde.