Un total de 145 municipios, con máis de 50.000 habitantes ou capital de provincia, recibirán subvencións para 330 proxectos, no marco do Plan de Recuperación, Transformación e Resiliencia (PRTR), e respondendo á primeira convocatoria do Ministerio de Política Territorial, correspondente a 2021, para transformación dixital e modernización das entidades locais.
A ministra de Política Territorial e portavoz do Goberno, Isabel Rodríguez, que adiantou en roda de prensa nA Coruña as cifras, destacou que este financiamento ten como obxectivo “facer máis intelixente ao Estado no territorio, para mellorar a eficacia e a eficiencia das administracións máis próximas, axilizar as xestións e trámites que cada día realizamos coas administracións municipais e aumentar a calidade de vida dos cidadáns e a calidade dos servizos públicos”.
O importe total das subvencións aprobadas hoxe ascende a 89.401.702,51 euros, o que representa o 96,4% do importe máximo contemplado na convocatoria e contará co financiamento do Ministerio de política Territorial, que comunicará a cada un dos 145 concellos as subvencións que recibirán os proxectos que presentaron.
Son as primeiras subvencións que recibirán os concellos de máis de 50.000 habitantes para financiar proxectos no ámbito da súa transformación dixital no marco do Plan de Recuperación, Transformación e Resiliencia.