- Os aspirantes cuxo apelido comece pola letra elixida serán os primeiros en intervir cando se establezan quendas e tamén en exames orais e probas individuais
O sorteo público celebrado hoxe na sede da Dirección Xeral de Función Pública, do Ministerio de Política Territorial e Función Pública, determinou que a letra “V” marcará a orde de intervención dos opositores nos procesos selectivos da Administración Xeral do Estado (AGE) de todo o ano.
No sorteo, todas as letras puideron ser comprobadas polos presentes no acto, e un funcionario, respondendo á chamada da subdirectora xeral de Planificación, Recursos Humanos e Retribucións, Yolanda Martínez Sevilla, ofreceuse voluntario para verificar a introdución de todas as letras nun saco branco do que despois extraeu unha delas, que correspondeu á letra “V”.
Cumprimento da normativa vixente
O artigo 17 do Real Decreto 364/1995, polo que se aproba o Regulamento Xeral de Ingreso do Persoal ao servizo da AGE e de Provisión de Postos de Traballo e Promoción Profesional dos Funcionarios Civís da AGE, establece que “con anterioridade ao comezo dos exercicios ou probas dos procesos selectivos, determinarase, mediante un único sorteo público celebrado previo anuncio no Boletín Oficial do Estado (BOE), a orde de actuación dos aspirantes en todas as probas selectivas que se celebren durante o ano”.
Así mesmo, o Real Decreto establece que “o resultado do sorteo publicarase no BOE e deberá recollerse en cada unha das convocatorias".
O BOE publicou o pasado 11 de xuño a Resolución do Secretario de Estado de Política Territorial e Función Pública que designaba data, hora e lugar (21 de xuño, ás 11:00 horas, na sede da Dirección Xeral da Función Pública, rúa Manuel Cortina, 2) para a celebración do sorteo público establecido no Regulamento Xeral de Ingreso do Persoal ao Servizo da AGE.
En cumprimento das medidas de distanciamento social dispostas polas autoridades sanitarias, por segundo ano consecutivo este acto volveu a contar con limitación do aforo.