O contido da exposición reflectirá todas as etapas que marcaron a historia do Pazo.

O Goberno segue traballando co obxectivo de que o Pazo de Meirás poida estar dispoñible canto antes para que a cidadanía poida visitalo. Uns labores de restauración de varias zonas do inmoble que avanzan en paralelo á preparación dunha exposición permanente, que servirá para contar a historia do Pazo.

Neste contexto, o secretario de Estado de Memoria Democrática, Fernando Martínez, mantivo unha reunión cos comisarios desta mostra, Xosé Manuel Núñez Seixas, catedrático de Historia Contemporánea na Universidade de Santiago de Compostela; e Emilio Grandío, profesor titular do Departamento de Historia Contemporánea e América na mesma universidade. No encontro tamén participou José Andrés Torres Moura, presidente de Acción Cultural Española (ACE), organismo que se vai a ocupar da realización da exposición.

Unha reunión na que se profundou no discurso expositivo que terá a mostra, que virará en torno ás catro etapas que marcaron a historia do Pazo: o universo de Pardo Bazán, Meirás como recinto de visitas de reis e conspiración, Meirás sede estival da xefatura do Estado franquista e, por último, a etapa máis recente, caracterizada polo esquecemento e a reivindicación cidadá para que fose restituído ao Patrimonio do Estado.

A exposición permanente utilizará os xardíns e contará con material audiovisual no que se relatará a historia do edificio.

A realización da montaxe da exposición e a apertura progresiva dos interiores ao público vai depender do avance das obras de recuperación dalgunhas zonas do Pazo e da evolución da pandemia de COVID, que xa provocou, tras as medidas adoptadas pola Xunta de Galicia para parar a pandemia, que a apertura ao público dos xardíns exteriores, prevista para o 30 de xaneiro, tivese que atrasarse.